სოლედარისთვის მძიმე ბრძოლები გრძელდება, - ამის შესახებ უკრაინის თავდაცვის მინისტრის მოადგილე, ანა მალიარი “ტელეგრამის” პირად გვერდზე წერს.
“სოლედარისთვის მძიმე ბრძოლები გრძელდება. მტერი ყურადღებას არ აქცევს საკუთარი პერსონალის დიდ დანაკარგებს და აქტიურ შტურმს აგრძელებს. ჩვენს პოზიციებთან მისადგომები, უბრალოდ, მოფენილია მტრის დაღუპული მებრძოლების ცხედრებით.
ჩვენი მებრძოლები მამაცურად აგრძელებენ დაცვას.
მხოლოდ ძალიან ძლიერ ერს შეუძლია დიდი და ძლიერი მტრის წინააღმდეგ ასე თავგანწირულად ბრძოლა”, - წერს მალიარი.
ცნობისთვის, რუსულმა წყაროებმა კვლავ განაცხადეს სოლედარზე “კონტროლის დამყარების” შესახებ. მათ ასევე ვიდეო გაავრცელეს, რომელიც, მათი მტკიცებით, სოლედერის ქალაქის ადმინისტრაციის შენობასთან არის გადაღებული.