11 000-მდე რუსი სამხედრო ბელარუსში იმყოფება, მიმდინარეობს როტაცია. ამის შესახებ უკრაინის სასაზღვრო სამსახურის უფროსმა სერჰი დეინეკომ განაცხადა.

მისივე თქმით, როტაციის პარალელურად, უკრაინის საზღვართან დაჯგუფების ზრდა არ შეინიშნება.

„დღეის მდგომარეობით, ბელარუსის რესპუბლიკის ტერიტორიაზე რუსული ჯარის რაოდენობა, დაახლოებით, 11 000 სამხედროა. ეს ციფრი ყოველდღიურად იცვლება, ვინაიდან, ახლა რუსეთის ქვედანაყოფების როტაცია ხდება, კერძოდ კი მეორე მოტომსროლელი დივიზია მეექვსე მოტომსროლელთა დივიზიამ ჩაანაცვლა“, - განაცხადა უკრაინის სახელმწიფო საზღვრის დაცვის სამსახურის უფროსმა სერჰი დეინეკომ.

მისი თქმით, უკრაინელი სამხედროები და მესაზღვრეები განაგრძობენ ბელარუსთან საზღვრის გაძლიერებას და ამ სამუშაოს ერთი წუთითაც არ წყვეტენ.