თბილისის მერის, კახა კალაძის განცხადებით, ძალიან ხშირია მოწოდებები, იმასთან დაკავშირებით, რომ საქართველოში რუსეთთან ომის მეორე ფრონტი უნდა გახსნილიყო.

როგორც კახა კალაძემ აღნიშნა, ქვეყნის ეროვნული ინტერესიდან გამომდინარე, საქართველო ომში ვერ ჩაერთვება.

კალაძე საქართველოში უკრაინის ელჩის მოვალეობის შემსრულებლის, ანდრეი კასიანოვის განცხადებას გამოეხმაურა, რომლის მიხედვითაც, მისთვის გაუგებარია, რატომაა შეუძლებელი საქართველომ უკრაინას სამედიცინო აფთიაქები, ინდივიდუალური თავდაცვის საშუალებები და საველე ჰოსპიტლები გადასცეს. როგორც თბილისის მერმა აღნიშნა, საქართველო უკრაინას ყველა საერთაშორისო პლატფორმაზე მხარს უჭერს.

„მიუხედავად იმისა, რომ ძალიან ხშირია მოწოდებები იმასთან დაკავშირებით, რომ საქართველოში მეორე ფრონტი უნდა გახსნილიყო, ჩვენ პოზიციას ვაფიქსირებთ. როგორ უნდა გესიამოვნოს ის, რაც უკრაინაში ხდება?! კატასტროფაა ომი და მშვიდობიანი მოსახლეობის გარდაცვალება. ქალაქები და სოფლები ინგრევა. ძალიან მძიმეა და ძალიან განვიცდით იმას, რაც უკრაინაში ხდება. შესაბამისად, ჩვენ უკრაინას ყველა საერთაშორისო პლატფორმაზე მხარს ვუჭერთ და გვინდა, რომ კიდევ ერთხელ ვუსურვოთ მშვიდობა. მიუხედავად ამისა, საქართველო ომში ვერ ჩაერთვება. ჩვენ ქვეყნის ეროვნული ინტერესი გვაქვს", - განაცხადა კახა კალაძემ.