ესტონეთი, გასულ კვირას გამოცხადებული სამხედრო დახმარების ახალი პაკეტის ფარგლებში, უკრაინას თავის ყველა 155 მმ კალიბრის ჰაუბიცას გადასცემს. ამის შესახებ უკრაინაში ესტონეთის ელჩმა კაიმო კუუსკმა განაცხადა.

"ჩვენ ყველა ჩვენს 155 მმ-იან ჰაუბიცას უკრაინას გადავცემთ და გვინდა ამ გზით შევქმნათ პრეცედენტი, რათა სხვა ქვეყნებს არ ჰქონდეთ საბაბი, თუ რატომ არ შეუძლიათ უკრაინას მიაწოდონ საჭირო იარაღი ომის მოსაგებად", - აღნიშნა ესტონელმა დიპლომატმა.

ელჩმა ასევე გამოაცხადა იარაღის სია, რომელსაც მისი ქვეყანა უკრაინას სამხედრო დახმარების ახალი პაკეტის ფარგლებში გადასცემს. მათ შორისაა, 155 მმ კალიბრიანი FH-70 ტიპის და 122 მმ კალიბრიანი D-30 ტიპის ათობით ჰაუბიცა, 155 მმ კალიბრიანი ათასობით საარტილერიო ჭურვი, ასობით ტანკსაწინააღმდეგო ყუმბარმტყორცნი M2 „Karl-Gustaf“ საბრძოლო მასალით და საარტილერიო დანაყოფების დამხმარე საშუალებები.