უკრაინის უახლესი სამხედრო დახმარება, რომელიც აშშ-ის პრეზიდენტმა, ჯო ბაიდენმა გუშინ გამოაცხადა, M1 Abrams-ის ტიპის ტანკების გარდა სხვა სამხედრო აღჭურვილობასა და სამხედრო მასალებსაც ითვალისწინებს, - მედიის ინფორმაციით ამის შესახებ პენტაგონში განაცხადეს.

მათივე ინფორმაციით, დახმარების პაკეტის ჯამური ღირებულება 400 მილიონ აშშ დოლარს შეადგენს და ის მოიცავს: Abrams-ის 31 ტანკს 120 მმ-იანი ჭურვებით და სხვა საბრძოლო მასალით, რვა ტაქტიკურ მანქანას, წვრთნების დაფინანსებასა და მხარდაჭერას.

უკრაინისთვის Abrams-ის ტანკების შესყიდვა უკრაინის უსაფრთხოების დახმარების ინიციატივის (USAI) მეშვეობით განხორციელდება.

„ეს 400 მილიონი დოლარის USAI პაკეტი აღნიშნავს კონტრაქტის პროცესის დაწყებას უკრაინისთვის დამატებითი შესაძლებლობების მიწოდების მიზნით“, - აცხადებენ პენტაგონში. ეს ნიშნავს, რომ ტანკები არ იქნება გატანილი საწყობებიდან, არამედ შეძენილი იქნება მწარმოებლებისგან.