გერმანული Leopard-ის ტიპის ტანკები უკრაინაში უფრო სწრაფად ჩავლენ, ვიდრე ამერიკული Abrams-ის ტანკები, - ამის შესახებ თეთრი სახლის სტრატეგიული კომუნიკაციების კოორდინატორმა ეროვნული უსაფრთხოების საკითხებში, ჯონ კირბიმ CNN-თან ინტერვიუში განაცხადა.

კირბი არ აკონკრეტებს ვადებს, თუ როდის შეძლებს აშშ უკრაინისთვის ტანკების მიწოდებას, თუმცა აცხადებს, რომ ამას "მრავალი თვე" დასჭირდება.

„Leopard-ის ტანკები ასევე ძალიან დახვეწილია. ისინი ძალიან კარგი ტანკებია და ევროპის კონტინენტზე ბევრი მათგანია. მადლობელი ვართ, რომ გერმანელები აპირებენ დაუყოვნებლივ გადასცენ 14 ტანკი. ამასთან, ისინი აპირებენ იმუშაონ მოკავშირეებთან და პარტნიორებთან, რათა დაამატონ ტანკების ორი სრული ბატალიონი, ეს არის დაახლოებით 60 ტანკი. ისინი უკრაინაში უფრო სწრაფად ჩავლენ, ვიდრე Abrams-ები“, - აღნიშნა კირბიმ.

შეგახსენებთ, აშშ-ის პრეზიდენტმა, ჯო ბაიდენმა გუშინ განაცხადა, რომ აშშ უკრაინისთვის Abrams-ის ტანკების მიწოდებას გეგმავს.