რუსეთის ფედერაციას 150 000 ადამიანი ჰყავს რეზერვში უკრაინის წინააღმდეგ ახალი შეტევისთვის, კიევი ძლიერად ემზადება ასეთი სცენარისთვის, - ამის შესახებ უკრაინის ეროვნული უსაფრთხოების საბჭოს მდივანმა, ოლექსი დანილოვმა განაცხადა.

მისი თქმით, მობილიზაციის დროს რუსეთში 300 000 ადამიანი გაიწვიეს - 150 000 უკვე გაგზავნილია ფრონტზე, დანარჩენი 150 000 კი - რუსეთის ფედერაციასა და ბელარუსის სხვადასხვა პოლიგონზე წვრთნებს გადის.

"ჩვენ გვესმის საფრთხეები და გამოწვევები, რომელთა წინაშეც დგას ჩვენი ქვეყანა. ჩვენ ამისთვის ვემზადებით ძალიან ძლიერად. პრეზიდენტი ყოველდღიურად ურთიერთობს თავის უცხოელ კოლეგებთან სამხედრო დახმარების საკითხზე და ყოველდღიურად გრძელდება მუშაობა ჩვენს ქვეყანაში. დიახ, ეს არის გამოწვევა ჩვენთვის, მაგრამ ჩვენ ამ გამოწვევას გადავლახავთ, რადგან 2022 წლის 24 თებერვალი გაცილებით რთული იყო. მაშინ მარტო ვიყავით აგრესორი ქვეყნის პირისპირ და არ გვჯეროდა ჩვენი გამარჯვების“, - განაცხადა დანილოვმა.

მისი თქმით, დღეს სრულიად განსხვავებული ვითარებაა და ყოველ კვირას მსოფლიოს სხვადასხვა კუთხიდან მოდის სიახლეები უკრაინისთვის დახმარების აღმოჩენის შესახებ.