უკრაინა ომის ძალიან აქტიური ფაზის ზღვარზე იმყოფება, - ამის შესახებ უკრაინის დაზვერვის მთავარი სამმართველოს წარმომადგენელმა ანდრეი იუსოვმა განაცხადა.
“ჩვენ ომის ძალიან აქტიური ფაზის ზღვარზე ვიმყოფებით. თებერვალიც და მარტიც - ძალიან აქტიური მოქმედებები იქნება”, - განაცხადა იუსოვმა.
მისი თქმით, ფრონტზე ვითარება რთულია - მტერი საიერიშო მოქმედებებს აგრძელებს.
იუსოვის განცხადებით, რუსებს ესმით, რომ უკრაინის საერთაშორისო მხარდაჭერა ძლიერდება და მალე შემდეგი “რამშტაინი” იქნება, ამიტომ აგრძელებენ ნაწილობრივად მობილიზებულების, ასევე “ვაგნერიდან” და სხვა კერძო სამხედრო კომპანიებიდან კრიმინალების შტურმისთვის გაგზავნას. იუსოვმა აღნიშნა, რომ მტრის დანაკარგები გაცილებით მეტია, ვიდრე უკრაინის არმიის, ამიტომ რუსებს მეტი არაფერი რჩებათ, ვიდრე “რაოდენობით” იომონ.
“უკრაინელი მებრძოლების უნარები და მოტივაცია, პლუს ტექნიკა და პლუს შეიარაღება - როგორც ადგილობრივი, ასევე საერთაშორისო პარტნიორების დახმარება - ეს არის ის, რაც საბოლოო ჯამში გარდამტეხს ხდის ამ საიერიშო მოქმედებების მსვლელობას”, - აღნიშნა იუსოვმა.