აშშ-მა უკრაინისთვის შორი მოქმედების რაკეტების გადაცემის შესახებ შესაძლოა პარასკევს გამოაცხადოს. ინფორმაციას ამის შესახებ გამოცემა The Wall Street Journal ავრცელებს.

გამოცემის თანახმად, აღნიშნული რაკეტები უკრაინისადმი ამერიკული სამხედრო დახმარების მორიგ პაკეტში შევა, რომლის შესახებაც ვაშინგტონმა შესაძლოა პარასკევს გამოაცხადოს.

საუბარია მცირე გაბარიტების მაღალი სიზუსტის Ground Launched Small Diameter Bomb (GLSDB) ჭურვებზე, რომელთა მოქმედების რადიუსი 150 კილომეტრს შეადგენს, რაც აშშ-ის მიერ უკრაინისადმი გადაცემულ ნებისმიერ იარაღს აღემატება.

GLSDB-ის ჭურვების გაშვება HIMARS-ის ტიპის სარაკეტო დანადგარებიდან არის შესაძლებელი, რომლებიც უკრაინას უკვე გააჩნია. ჭურვს აქვს ფრთები, რაც მიზნისადმი გზაზე პლანირების საშუალებას აძლევს, და სარაკეტო ძრავა, რაც ფრენის სიშორეს ზრდის.

ცნობისთვის, თავდაპირველად უკრაინისადმი შორი მოქმედების ჭურვების გადაცემის შესაძლებლობის შესახებ Reuters-მა დაწერა. გამოცემის თანახმად, მათი გადაცემა ყველა დროის ერთ-ერთი ყველაზე დიდი, 2.2 მილიარდი დოლარის ღირებულების, სამხედრო დახმარების პაკეტის ფარგლებში მოხდება.