არ ვიცი, რატი ბრეგაძეს ეს ინფორმაცია ვისგან აქვს, მე ყველაფრის მოწმე ვარ. რა თვითდაზიანებაც ეს არის, ძალიან კარგად ვხედავ, - ასე გამოეხმაურა საქართველოს მესამე პრეზიდენტის დედა, გიული ალასანია საქართველოს იუსტიციის მინისტრის, რატი ბრეგაძის განცხადებას, რომ სპეციალური პენიტენციური სამსახური, იუსტიციის სამინისტრო და სამედიცინო პერსონალი პაციენტის თვითდაზიანებაზე პასუხისმგებელი ვერ იქნება.

ყოფილი პრეზიდენტის დედის, გიული ალასანიას განცხადებით, ხელისუფლების მიზანია, რომ „მიხეილ სააკაშვილი აღარ არსებობდეს.“

„ხელისუფლების მიზანია ის, რასაც ვხედავთ, აი, შედეგი სადაც არის. მათი მიზანია, რომ მიხეილ სააკაშვილი არსად არ იყოს, არსად აღარ არსებობდეს. ესე იგი გამოდის, რომ თვითდაზიანებაზე პასუხისმგებლობა იმას {მიხეილ სააკაშვილს} და ჩვენ {ოჯახის წევრებს}, პირადად მე მეკისრება. ყველაფერი ჩვენი ბრალია, ხომ მიხვდით ოჯახის წევრების და თვითონ მისი“, -აღნიშნა ალასანიამ.

გიული ალასანიას განმარტებით, მიხეილ სააკაშვილი პარენტერალურ კვებას არ თანხმდება, რადგან მას „ყოველი კუთხიდან“ ეუბნებიან, რომ კლინიკას მსგავსი გამოცდილება არ აქვს.

„ექიმების რეკომენდაციაა, რომ ჭამოს და კალორიები მიიღოს, მაგრამ ვერ იღებს, რა ვქნათ. სწორედ, ეს არის მისი ავადმყოფობა. პარენტერალურ კვებას არ თანხმდება იმიტომ, რომ ყოველი კუთხიდან ესმის, რომ საავადმყოფოს ამის გამოცდილება არ აქვს. იმით მოკვდება, თუ ამით მისთვის მნიშვნელობა უკვე არ აქვს.

მადლობა ღმერთს, პატიოსანი ექიმები გვყავს. ყველა ექსპერტი, ვინც იმ კონსილიუმში ჩართული იყო, ყველა ერთი და იმავეს ამბობს, ჩვენ გუშინაც მოვისმინეთ, რამდენიმე ექიმის სასამართლოს დარბაზში გამოსვლა, ყველას მინდა დიდი მადლობა ვუთხრა, რომ მათ პროფესიული კეთილსინდისიერება და ცოდნა აღმოაჩნდათ. ის დასკვნები მივიღეთ, რომელიც რეალობას შეესაბამება“, - განაცხადა გიული ალასანიამ.

ასევე, ალასანია უკრაინის პრეზიდენტს, ვოლოდიმირ ზელენსკის მადლობას უხდის, მიხეილ სააკაშვილის მძიმე ჯანმრთელობის მდგომარეობას, რომ გამოეხმაურა.

„მადლობელი ვარ ვოლოდიმირ ზელენსკის, რადგან ეს კაცი აბსოლუტურად სწორია“, - აცხადებს გიული ალასანია.