მიხეილ სააკაშვილი თვითდაზიანების რეჟიმშია, ჯანმრთელობას შეგნებულად იუარესებს და ასეთ დროს ხელისუფლების დადანაშაულება, რა საკვირველია, აბსურდულია, - ასეთია პარლამენტის ადამიანის უფლებათა დაცვის კომიტეტის თავმჯდომარის მიხეილ სარჯველაძის პოზიცია.

სარჯველაძის თქმით, იუსტიციის მინისტრმა სწორედ ამის თაობაზე ისაუბრა და არავითარ პასუხისმგებლობაზე საუბარი მართებული არ არის.

"სამწუხაროდ, ხელისუფლების ბევრი ოპონენტია, ვინც მოწადინებულია, რომ სააკაშვილთან დაკავშირებით რაღაც დრამატული და ისტერიული ფონი შექმნან.

სამწუხაროდ, აქტიურია მოწოდებები თვითდაზიანების გაღრმავების მიმართულებით. რა საკვირველია, ეს ცეცხლთან თამაშია, ეს არ არის კეთილსინდისიერი და ზნეობრივი მათი მხრიდან.

რაც შეეხება ევროპარლამენტს, თქვენ ხედავთ, რა არის ფაქტობრივი მოცემულობა. არ ვიცი, იგივე ევროპარლამენტარებიდან ვინ რაზე დაყრდნობით აკეთებს განცხადებებს, რომ წამებას აქვს ადგილი. ვშიშობ, რომ

შეიძლება ადგილი ჰქონდეს არასწორ ინფორმირებას, შეიძლება ადგილი ჰქონდეს მიკერძოვებულ დასკვნებს. ფაქტია, რომ არავითარ წამებას ადგილი არა აქვს - ეს ადამიანი დაკავებულია თვითდაზიანებით და მან უნდა გააცნობიეროს პასუხისმგებლობა, რაც ასეთ ქცევას მოსდევს", - განაცხადა მიხეილ სარჯველაძემ.