რატი იონათამიშვილი - უკეთესი იქნებოდა, ზელენსკის ხელში ის სურათები დაეკავებინა, რომელიც საქართველოში მიხეილ სააკაშვილის ქურდულ შემოპარვასა და უკრაინის სახელმწიფო საზღვრის უკანონო კვეთას ასახავდა

უკეთესი იქნებოდა, ზელენსკის ხელში ის სურათები დაეკავებინა, რომელიც საქართველოში მიხეილ სააკაშვილის ქურდულ შემოპარვასა და უკრაინის სახელმწიფო საზღვრის უკანონო კვეთას ასახავდა, - ეს განცხადება ჟურნალისტებთან „ქართული ოცნების“ დეპუტატმა რატი იონათამიშვილმა გააკეთა.

იონათამიშვილმა მიხეილ სააკაშვილთან დაკავშირებით უკრაინის პრეზიდენტის განცხადებას „უხერხული“ უწოდა.

„როცა ჩვენი ქვეყანა ერთ-ერთი ყველაზე აქტიური მხარდამჭერია უკრაინის, როგორც ჰუმანიტარული, ასევე პოლიტიკური თვალსაზრისით, ასეთი განცხადება ცოტა უხერხულია, მითუმეტეს იმ სახელმწიფოს მიმართ, ვინც ერთ-ერთი მაგალითია იმისა, თუ რა მძიმე შედეგები აქვს ოკუპაციასთან და როგორ შეიძლება საერთაშორისო სასამართლოებში ოკუპაციის წინააღმდეგ დავები აწარმოოს“, - განაცხადა იონათამიშვილმა.