იტალიის პრემიერ-მინისტრი ჯორჯია მელონი უკრაინაში 24 თებერვლამდე ჩავა. ამის შესახებ, იტალიური გამოცემა ANSA-ს ცნობით, მელონიმ გერმანიაში ვიზიტის დროს განაცხადა.
"კიევში 24 თებერვლამდე [ომის დაწყებიდან პირველი წლისთავი] ვიქნები”, - თქვა მელონიმ.
მან ასევე აღნიშნა, რომ უკრაინის მხარდაჭერის საკითხში იტალიასა და გერმანიას შორის “ძლიერი სინერგია” არსებობს.
მელონის თქმით, ორივე ქვეყანა მჭიდროდ თანამშრომლობდნენ უკრაინისთვის თავდაცვაში დასახმარებლად და “ამის კეთებას იმდენ ხანს გააგრძელებენ, რამდენიც საჭირო იქნება”.
იტალიის პრემიერ-მინისტრმა აღნიშნა, რომ უკრაინისთვის ანტისარაკეტო თავდაცვის საკითხზე იტალია საფრანგეთთან თანამშრომლობს.
"ჩვენი დახმარების მეექვსე პაკეტი ჩამოვაყალიბეთ”, - თქვა მელონიმ.
ცნობისთვის, 2023 წლის იანვრის შუა რიცხვებში უკრაინის პრეზიდენტმა ვოლოდიმირ ზელენსკიმ დაადასტურა, რომ უახლოეს პერიოდში იტალიის პრემიერ-მინისტრი უკრაინას ეწვევა. მელონიმ, თავის მხრივ, ზელენსკი რომში მიიპატიჟა.