უკრაინის პრეზიდენტმა ვოლოდიმირ ზელენსკიმ რამდენიმე ყოფილ პოლიტიკოსს მოქალაქეობა ჩამოართვა. შესაბამისი გადაწყვტილების შესახებ ზელენსკიმ 4 თებერვალს განაცხადა.
„დღეს მე ხელი მოვაწერე შესაბამის დოკუმენტებს, რათა გადავდგათ კიდევ ერთი ნაბიჯი ჩვენი სახელმწიფოს დასაცავად და გასასუფთავებლად აგრესორის გვერდით მყოფთაგან“, - აღნიშნა ზელენსკიმ მიმართვაში.
ზელენსკიმ არ დაასახელა კონკრეტული სახელები, მაგრამ აღნიშნა, რომ მათ აქვთ რუსეთის მოქალაქეობაც.
უკრაინული მედიის ცნობით, სიაში შედის რამდენიმე წამყვანი პოლიტიკოსი ვიქტორ იანუკოვიჩის ოფისიდან, რომელიც უკრაინის პრორუსი პრეზიდენტი იყო 2010 წლიდან 2014 წლამდე, თანამდებობიდან გადაყენებამდე.
მედიის ცნობით, სიაში შედიან: განათლებისა და მეცნიერების ყოფილი მინისტრი დმიტრო ტაბაჩნიკი, ყოფილი ვიცე-პრემიერი და იანუკოვიჩის ადმინისტრაციის ხელმძღვანელი ანდრეი კლიუევი, ასევე შინაგან საქმეთა ყოფილი მინისტრი ვიტალი ზახარჩენკო.
უკრაინამ რუსეთის შეჭრის შემდეგ, უკრაინის მოქალაქეობა რამდენიმე ადამიანს ჩამოართვა და დაუწესა სანქციები ასობით რუს და ბელარუს ფიზიკურ პირს და კომპანიას.