დღეს ვნახავთ, რომ მორიგ ჯერზე, ევროპარლამენტში წარმოდგენილი ყველა პოლიტიკური ძალა, მათ შორის, "ქართული ოცნების" პარტნიორი პარტია - „სოციალისტური პარტია", მოუწოდებს საქართველოს ხელისუფლებას, რომ მიხეილ სააკაშვილი გადაყვანილი იქნას სამკურნალოდ საზღვარგარეთ, - ამის შესახებ ლელოს" დეპუტატმა სალომე სამადაშვილმა განაცხადა.

მისი თქმით, ეს ადასტურებს, რომ მიხეილ სააკაშვილის სიცოცხლის და ჯანმრთელობის მდგომარეობა სცდება ერთ კერძო პრობლემას და გამოწვევას უქმნის ამ ქვეყნის ევროპულ მომავალს.

„დღეს ევროპარლამენტში უნდა მსჯელობდნენ იმაზე, როგორ დაუჭირონ მხარი ჩვენთვის კანდიდატის სტატუსის მონიჭებას, ამის ნაცვლად უწევთ მსჯელობა ყოფილი პრეზიდენტის სიცოცხლის და ჯანმრთელობის გადარჩენაზე. მე არ ვიცი, საბოლოოდ გავა თუ არა შესწორება ივანიშვილის სანქცირების მოთხოვნის თაობაზე, მაგრამ ყველა შემთხვევაში, ის ფაქტი, რომ ევროპარლამენტი საგანგებო რეჟიმში იღებს რეზოლუციას, არის ნათელი გზავნილი ქართველი ხალხისთვისაც და საქართველოს ხელისუფლებისთვისაც, რომ მიუხედავად იმისა, რომ ქვეყანას აქვს ძალიან დიდი პოლიტიკური მხარდაჭერა, სააკაშვილის პრობლემის გადაჭრა არის ფუნდამენტურად მნიშვნელოვანი ქვეყნის ევროპული მომავლის უზრუნველსაყოფად”,- განაცხადა სამადაშვილმა.

ევროპარლამენტში საქართველოს ყოფილი პრეზიდენტის, მიხეილ სააკაშვილის ჯანმრთელობის მდგომარეობასთან დაკავშირებულ რეზოლუციას კენჭს დღეს უყრიან. შესაბამისი ინფორმაცია ევროპარლამენტის ვებგვერდზეა გამოქვეყნებული.

ევროპარლამენტში რეზოლუციის ხუთი ტექსტია წარდგენილი, რომელთაგან ორში ბიძინა ივანიშვილის შესახებაც არის საუბარი. ერთი ტექსტის ავტორია „ევროპის სახალხო პარტია“ , მეორის კი - „ევროპული კონსერვატორებისა და რეფორმისტების ჯგუფი“.