რუსული აგრესიისგან საბოლოოდ გათავისუფლების ალტერნატივა არ არსებობს და არც იქნება, - ამის შესახებ უკრაინის პრეზიდენტმა ვოლოდიმირ ზელენსკიმ მიუნხენის უსაფრთხოების კონფერენციაზე სიტყვით გამოსვლის დროს განაცხადა, რომელსაც დისტანციურად ესწრება.

მისი თქმით, უკრაინას რუსეთის მიერ ოკუპირებული ტერიტორიების გათავისუფლება და რუსული სარაკეტო დარტყმებისგან საკუთარი მოქალაქეების დაცვა შეუძლია.

„რაც უფრო დიდხანს გრძელდება ევროკავშირის გაფართოების შესახებ მოლაპარაკებები, მით უფრო დიდი დესტრუქციულობა შეაქვს კრემლს რუხ ზონაში ევროკავშირსა და რუსეთს შორის. რაც უფრო ხმამაღლა ითქმოდა, რომ უკრაინას ლოდინი სჭირდება, ვიდრე ნატოს ღია კარში შესვლის უფლებას მისცემენ, მით უფრო აგრესიული ხდებოდა რუსეთის პოლიტიკა. რაც უფრო გრძელი იყო ყირიმთან დაკავშირებით სიჩუმე, მით უფრო ძლიერი ხდებოდა რუსული რევანშიზმი… ახლა ამ ყველაფრის გამოსწორება ხდება.

როგორც გასულ წელს, დაუყოვნებლივ ქმედებას გთავაზობთ. მაგრამ წინა წლისგან განსხვავებით, უფრო დამაჯერებელი არგუმენტები მაქვს - ჩვენი მიღწევები… ჩვენ შეგვიძლია ჩვენი მიწის გათავისუფლება და ამის 1 891 მტკიცებულება არსებობს. რუსული ოკუპაციისგან სწორედ ამდენი სოფლის, ქალაქის გავათავისუფლება უკვე შევძელით”, - განაცხადა ზელენსკიმ.

მან აღნიშნა, რომ დღეს უკრაინის გამარჯვების, ევროკავშირსა და ნატოში უკრაინის შესვლის ალტერნატივები არ არსებობს.

„ამიტომ რუსული აგრესიის საბოლოოდ მოშორების ალტერნატივაც არ იქნება, ასევე მიწისა და ხალხის გათავისუფლების, რადგან ყოველი ჩვენი ქალაქი ან სოფელი - ეს ხალხია, რომელიც ტყვეობაშია. ადამიანები არ შეიძლება კომპრომისის საკითხი იყონ”, - განაცხადა ზელენსკიმ.