საფრანგეთის პრეზიდენტი ემანუელ მაკრონი არ მიიჩნევს, რომ რუსეთში რეჟიმის ცვლილება პოზიტიურ ცვლილებებს მოიტანს. ამის შესახებ მან მიუნხენის უსაფრთხოების კონფერენციაზე გამოსვლისას განაცხადა.
„არ მჯერა, რომ რეჟიმის შეცვლა რაიმეს გამოიწვევს. როცა მესმის, რომ ბევრი ადამიანი მხარს უჭერს რეჟიმის შეცვლას, ვკითხულობ: რით შეიცვალოს? ვინ არის შემდეგი? ვინ არის შენი ლიდერი? გასული ათწლეულების განმავლობაში ჩვენ ვნახეთ ბევრ ქვეყანაში რეჟიმის შეცვლა, რომლებიც წარუმატებელი იყო“, - განაცხადა მაკრონმა.
მაკრონის თქმით, პირველ რიგში, აუცილებელია უკრაინის დახმარება სუვერენიტეტისა და დამოუკიდებლობის შენარჩუნებაში, ხოლო რუსეთში ცვლილებებზე საუბარი ჯერ ნაადრევია.
მაკრონმა ასევე აღნიშნა, რომ დასავლეთს ბოლომდე არ გადაუხარშავს ცივი ომის დასრულების შედეგები, რუსეთმა კი, ბოლომდე ვერ გადახარშა ის ფაქტი, რომ ის იმპერია აღარ არის.
„ცხადია, ამ აგრესიის გამომწვევი მიზეზი არის გეოპოლიტიკური დომინანტური აკვიატება. რუსეთს ჰქონდა დაბალი მშპ და დემოგრაფიული ვითარების დაქვეითება, მაგრამ ამავე დროს იყო უდიდესი ქვეყანა მსოფლიოში უზარმაზარი საზღვრებით და ის იყო არჩევანის წინაშე - ფსონი მის მომავალზე დაედო ევროპასთან შეერთებით, ან იმპერიის ოცნებას დაბრუნებოდა და მან აირჩია ეს უკანასკნელი“, - განაცხადა მაკრონმა.