თბილისის საკრებულოს სხდომაზე მიღებული გადაწყვეტილებით, დედაქალაქის 2023 წლის ბიუჯეტი 143 მილიონი ლარით გაიზარდა და დღეს 1 მილიარდ 775 მილიონი ლარით განისაზღვრა. როგორც თბილისის საკრებულოს თავმჯდომარემ აღნიშნა, გაზრდილი ბიუჯეტით განსახორციელებელი პროექტები კიდევ უფრო მასშტაბურ ხასიათს მიიღებს.

„თბილისის ბიუჯეტის მოცულობა 143 მილიონი ლარით გაიზარდა და დღეს 1 მილიარდ 775 მილიონ ლარს შეადგენს. ეს ნიშნავს, რომ ბიუჯეტით გათვალისწინებული პრიორიტეტული მიმართულებებით განსახორციელებელი პროგრამები უფრო მეტად ეფექტიანი გახდება და კიდევ უფრო მასშტაბურ ხასიათს შეიძენს. გაძლიერდება და გაფართოვდება ისეთი პროექტები, როგორებიცაა: სატრანსპორტო ინფრასტრუქტურის მოწესრიგება, საქალაქო სამგზავრო ტრანსპორტის სუბსიდია, გამწვანების, დასუფთავების, ჯანდაცვისა და სოციალური პროექტები. განსაკუთრებით აღსანიშნავია, რომ ცვლილებების თანახმად, თბილისის მოსახლეობისთვის დამატებით ახალ ინფრასტრუქტურულ და კეთილმოწყობის პროექტებს მუნიციპალიტეტის შესაბამისი სამსახურები და რაიონის გამგეობები განახორციელებენ. გაზრდილი და პრიორიტეტების მიხედვით განაწილებული ბიუჯეტი საბოლოო ჯამში ხელს შეუწყობს დედაქალაქის ეკონომიკის სწრაფ განვითარებას, ახალი სამუშაო ადგილების შექმნასა და კომფორტის უზრუნველყოფას ჩვენი ქალაქის მოსახლეობისთვის“ - განაცხადა გიორგი ტყემალაძემ.