„ქართული ოცნება" თავს რუსეთის აგენტად აცხადებს - თითოეული დეპუტატი ვინც ე.წ. აგენტების კანონს მხარს დაუჭერს, ქვეყნის მოღალატე იქნება, - ამის შესახებ ჟურნალისტებთან ოპოზიციონერმა დეპუტატმა რომან გოცირიძემ განაცხადა.

მისი თქმით, ამ ქმედების სხვაგვარი ფორმულირება შეუძლებელია.

„როცა ამ კანონის წინააღმდეგ გამოდის მთელი მსოფლიო, გაერო, ევროკავშირი, ყველა წესიერი ადამიანი საქართველოში და ამის მიუხედავად არის მცდელობა ამ კანონის გატანის თუნდაც, პირველი მოსმენით, პრინციპების დონეზე, ეს იმას ნიშნავს, რომ ეს ხალხი ანუ "ქართული ოცნება" და არავითარი რაღაც ძალა არ არსებობს, პირდაპირ აცხადებს თავს რუსეთის აგენტებად. შეიძლება ჩავთვალოთ, თითოეული დეპუტატი ვინც ამ კანონს მხარს დაუჭერს პირველი მოსმენით იქნება ქვეყნის მოღალატე. ეს სიტყვა საერთოდ იშვიათად უნდა გამოიყენო, მაგრამ ამის სხვანაირად ფორმულირება შეუძლებელია. ეს იქნება იმ აქტის ტოლფასი, როცა შევარდნაძის დროს პარლამენტის წევრებმა მხარი დაუჭირეს საქართველოს დსთ- ში გაწევრიანებას“, - განაცხადა გოცირიძემ.

ინფორმაციისთვის, პარლამენტი ე.წ. აგენტების შესახებ კანონპროექტების განხილვას იწყებს. პროექტებს სახელწოდებით - „უცხოური გავლენის გამჭვირვალობის შესახებ“ და „უცხოელი აგენტების რეგისტრაციის შესახებ“ 2 მარტს, პარლამენტის საგარეო ურთიერთობათა და თავდაცვისა და უშიშროების კომიტეტების ერთობლივ სხდომაზე განიხილავენ.

პარლამენტში თავდაპირველად „უცხოური გავლენის გამჭვირვალობის შესახებ“ კანონპროექტი დარეგისტრირდა. აღნიშნული კანონპროექტი „გამჭვირვალობის უზრუნველყოფის მიზნით“, უცხოური გავლენის აგენტებად ისეთი არასამეწარმეო (არაკომერციული) იურიდიული პირებისა და მედიასაშუალებების რეგისტრაციას ითვალისწინებს, რომელთა შემოსავლის გარკვეული მოცულობა (20%-ზე მეტი) უცხოეთიდან არის მიღებული.

კანონპროექტის მიხედვით, ყველა, ვინც „უცხოური გავლენის აგენტად“ მოიაზრება, საჯარო რეესტრში სავალდებულო წესით ამავე სახელწოდების ბაზაში უნდა დარეგისტრირდეს. უცხოური გავლენის აგენტად რეგისტრაციისთვის თავის არიდება ან დეკლარაციის არშევსება გამოიწვევს ორგანიზაციის დაჯარიმებას

რაც შეეხება „უცხოელი აგენტების რეგისტრაციის შესახებ“ კანონპროექტს, აღნიშნული პროექტის გათვალისწინებით, უცხოეთის აგენტად რეგისტრაციის ვალდებულება ნებისმიერ ფიზიკურ და იურიდიულ პირს ექნება, რომელიც დაფინანსებას უცხოეთიდან იღებს.

უცხოელი აგენტების რეგისტრაციის შესახებ“ კანონით გათვალისწინებული ვალდებულების შეუსრულებლობა ან არაჯეროვნად შესრულება გამოიწვევს სისხლის სამართლის პასუხისმგებლობას და იქნება დასჯადი ჯარიმით ან თავისუფლების აღკვეთით - 5 წლამდე ვადით.