ეს გზა გაიარა რუსეთმა და დღეს რუსეთში მანახეთ დამოუკიდებელი ჟურნალისტი, უფლებადამცველი - ვერ ნახავთ! ეს გზა მიგვიყვანს დაუცველ მოქალაქეებამდე, - ამის შესახებ სახალხო დამცველის მოადგილე გიორგი ბურჯანაძემ ჟურნალისტებთან საგარეო ურთიერთობათა და თავდაცვისა და უშიშროების კომიტეტების გაერთიანებული სხდომის დასრულების შემდეგ განაცხადა, სადაც ე.წ. აგენტების შესახებ კანონპროექტებს მხარი დაუჭირეს.

ბურჯანაძის თქმით, მხარდაჭერილი კანონპროექტები ეწინააღმდეგება ევროკავშირის კანდიდატის სტატუსის მისაღებად განსაზღვრული 12 პუნქტიდან 2- ს, ასევე ევროკავშირის სტანდარტებს და ევროკავშირის მართლმსაჯულების სასამართლოს მიერ გამოტანილ გადაწყვეტილებას.

"კანონპროექტი, რომელიც ინიცირებულია პარლამენტში, არაფერს სხვას არ აკეთებს გარდა იმისა, რომ ახდენს არასამთავრობო სექტორის სტიგმატიზებას და აგენტებად გამოყვანას. ეს საშიში იმიტომ არის, რომ ანალოგიურად, რომ ვითომ არაფერი ხდება და უბრალოდ რეგისტრაციაა, ეს გზა გაიარა რუსეთმა და დღეს რუსეთში მანახეთ დამოუკიდებელი ჟურნალისტი, უფლებადამცველი - ვერ ნახავთ! ეს გზა გაიარა რუსეთმა და ის მიგვიყვანს დაუცველ მოქალაქეებამდე, გაუმჭვირვალე საზოგადოებამდე. ამიტომ ვეძახით ამ კანონს რუსულს და ამიტომ არის დაუშვებელი მისი მიღება. მე არ მეგულება მსოფლიოში რომელიმე ორგანიზაცია, თანამდებობის პირი, რომელმაც არ დაგმო და არ გააკრიტიკა ეს კანონპროექტები. ეს არის ძალიან საშიში კანონი და თუ რაიმე საერთაშორისო სტანდარტი შეიძლება არსებობდეს მსოფლიოში, მათ შორის, ჩვენი კონსტიტუცია, ყველაფერს ეწინააღმდეგება. საქართველოს მოქალაქეებისთვის ეს კანონი განსაკუთრებით საშიშია, ჩვენ გვაქვს განაცხადი ევროკავშირის წევრობაზე გაკეთებული და 12 პუნქტიდან 2- ს პირდაპირ ეწინააღმდეგება. ეს ეწინააღმდეგება ევროკავშირის სტანდარტებს და ევროკავშირის მართლმსაჯულების სასამართლოს მიერ გამოტანილ გადაწყვეტილებას რამდენიმე წლის წინ, ამის მიღება საქართველოში არის დაუშვებელი",- განაცხადა ბურჯანაძემ.