სალომე სამადაშვილმა სტუდენტებს ე.წ. აგენტების შესახებ კანონპროექტის მხარდამჭერების ლექციების ბოიკოტისკენ მოუწოდა

„ლელოს“ დეპუტატმა სალომე სამადაშვილმა სტუდენტებს ე.წ. აგენტების შესახებ კანონპროექტის მხარდამჭერების ლექციების ბოიკოტისკენ მოუწოდა.

ამის შესახებ მან პლენარულ სხდომაზე კანონპროექტის განხილვისას განაცხადა.

„თქვენ რუბიკონი გადალახეთ, დღეს ბოლო შანსი გაქვთ ამ კანონპროექტის კენჭისყრის დროს, დაგვარწმუნოთ, ჩვენ თქვენ უნდა ჩაგვთვალოთ ჩვენს თანამოქალაქეებად და არა საოკუპაციო რეჟიმის მსახურებად. ნუ გწყინთ ჩვენი დამოკიდებულება. შარლ მიშელის შეთანხმება შევათანხმეთ თქვენთან, მოიტყუეთ, არ შეასრულეთ. რამდენჯერ მოატყუეთ ქართველი ხალხიც და ოპოზიციაც, რომელიც ცდილობდა რომ ქვეყნის ინტერესებიდან გამომდინარე, მოეძებნა რაიმე საერთო ენა, მაგრამ ვერ შედგა დეპოლარიზაცია, კონსენსუსი. იცით, რატომ? იმიტომ, რომ ჩვენ, სამშობლოს ინტერესებს, იმიტომ, რომ თქვენ ისხდეთ იმ სავარძლებში და იყოთ იმ თანამდებობებზე, სადაც ხართ, ვერ დავთმობთ. მე თქვენთან სასაუბრო არაფერი აღარ მაქვს, ვისაც სინდისი ჰქონდა, „ქართული ოცნების“ რიგებში დღეს აღარაა. მე მინდა მივმართო ქართველ ხალხს, რომელიც არის შეკრებილი დღეს საქართველოს პარლამენტთან, ძვირფასო თანამოქალაქეებო, თქვენ ხართ ჩვენი თანამოქალაქეები და ჩვენ თქვენთან ერთად ვართ უმრავლესობაში ამ ქვეყანაში. ტრაგედია არის ის, რომ ჩვენ, ვისაც გვსურს ამ ქვეყნის ევროპული მომავალი, ვართ უმრავლესობა საქართველოში, მაგრამ საქართველოს წარმომადგენლობით ორგანოში ვართ უმცირესობაში, ეს რეალობა აუცილებლად შეიცვლება. ის, რაც დღეს ჩვენ უნდა გამოვაცხადოთ, ეს არის რუსეთის საოკუპაციო რეჟიმის წინააღმდეგ ერთიანი წინააღმდეგობის მოძრაობა ქართველი ხალხის, საზოგადოების და მოქალაქეების. მიხარია ის, რომ სულ უფრო მეტი სტუდენტი უერთდება პროტესტს. მიხარია, რომ პროტესტს თსუ-ის იურიდიული ფაკულტეტის სტუდენტები შემოუერთდნენ. სტუდენტებო, მოგიწოდებთ, ბოიკოტისკენ რუსული საოკუპაციო რეჟიმის მსახური ლექტორებისთვის, არ შეხვიდეთ მათ ლექციაზე, ამით თქვენ ყველაზე კარგ პასუხს გასცემთ საოკუპაციო რეჟიმს“, - განაცხადა სალომე სამადაშვილმა.

სამადაშვილის საპასუხოდ პარლამენტის თავმჯდომარემ შალვა პაპუაშვილმა აღნიშნა, რომ ლექციების ბოიკოტის მოწოდება, არის ფაშიზმი.

„ეს თქვენ უკვე გააკეთეთ, როდესაც გარიყეთ ადამიანები აუდიტორიებიდან და სხვადასხვა ოთახებიდან. ამას ჰქვია ფაშიზმი. 2012 წლამდე ეს თქვენ გაკეთებული გაქვთ. ახლა რასაც მოუწოდებთ, მაგას ჰქვია ფაშიზმი. ადამიანების გარიყვა არის თქვენი ერთადერთი პოლიტიკა. სამ წუთში თქვენი 9 წელი გააღვიძეთ“,- განაცხადა შალვა პაპუაშვილმა.

სტეპან გრიგორიანი - უახლოეს 2-3 თვეში არსებობს იმის შანსი, რომ თურქეთ-სომხეთის საზღვარი მესამე ქვეყნის მოქალაქეებისა და დიპლომატებისთვის გაიხსნას
ქართული პრესის მიმოხილვა 24.06.2024
ალექსანდრე თვალჭრელიძე - ძალიან მინდა დავიჯერო, რომ ჩინური კომპანიის შერჩევა პროექტის განსახორციელებლად უბრალოდ გაუაზრებელი ნაბიჯია და არა პოლიტიკური ტრენდის შეცვლის შემაშფოთებელი ნიშანი
კახა ოქრიაშვილი - საქართველოსთვის ევროკავშირის კანდიდატი ქვეყნის სტატუსი გაყინულია, რაც იმას ნიშნავს, რომ გაყინულია პერსპეტივა ქართველი მასწავლებლის საშუალო ხელფასი 4 500 ლარი გახდეს
კახა ოქრიაშვილი - 2016 წელს 2 მილიონი „ოცნებას“ გადავუხადე თუ პირადად ბატონ ივანიშვილს?