„სტრატეგია აღმაშენებლის“ ლიდერის, გიორგი ვაშაძის განცხადებით, მას შემდეგ, რაც საპროტესტო აქციაზე მყოფებმა ხელისუფლებას მოთხოვნების შესასრულებლად ერთი საათი მისცეს, მათთან კონტაქტზე არავინ გასულა.

როგორც ვაშაძე განმარტავს, ხელისუფლება, რომელიც შეკრებილ 100 000 ადამიანს არ ელაპარაკება, საუბრის ღირსი არაა.

„სამწუხაროდ, ეს მხდალები და ლაჩრები იმალებიან, არავინ გამოდის კონტაქტზე, უპრობლემოდ შეუძლიათ ჩვენი ტელეფონის მოძებნაც ან შეეძლოთ საჯაროდ გაეკეთებინათ განცხადება, მაგრამ ისინი ჩვენს გამძლეობას ცდიან. მეგობრებო, ბრძოლა, რომელშიც ჩვენ ვართ, ძალიან რთული ბრძოლაა, ეს ბრძოლა ნიშნავს, რომ ჩვენ არ უნდა დავიღალოთ, უნდა დაიღალონ ისინი და უკან უნდა დაიხიონ მათ. შენ, ხელისუფლება, შეკრებილ 100 000-ზე მეტ ადამიანს არ ელაპარაკები, როცა ემალები, შენ არაფრის ღირსი აღარ ხარ, არ ხარ არანაირი ლაპარაკის ღირსი! ამიტომ, ჩვენ გთავაზობთ შემდგომი ნაბიჯის გადადგმას, მშვიდობიანად და წყნარად, ეს გადაწყვეტილება არის ყველასი, აქ მდგომის, საინიციატივო ჯგუფის, ახალგაზრდების, სხვადასხვა ორგანიზაციის და რაც მთავარია, ამ გადაწყვეტილებაზე ხელის აწევით კვლავ დავადასტუროთ, თუ ეთანხმებით, ეს ნაბიჯი გადავდგათ! დავიძრათ პარლამენტის გარშემო და ალყაში მოვაქციოთ პარლამენტი, რომელიც გეკუთვნით თქვენ!“, - განაცხადა ვაშაძემ.