საქართველოს პარლამენტის ოპოზიციონერი დეპუტატი არმაზ ახვლედიანი აცხადებს, რომ შს ყოფილი მინისტრის ვანო მერაბიშვილის განცხადებები „მავნებლობაა“ და „ივანიშვილის რეჟიმის შენარჩუნებას ემსახურება“.

ამის შესახებ არმაზ ახვლედიანის თქმით, „ოცნების ძალადობრივი მანქანა“ სწორედ მსგავსი „რევანშისტული ძალების ხარჯზე ინარჩუნებს მმართველობას“.

„გასული კვირის დიდებული საპროტესტო მუხტისა და უმნიშვნელოვანესი ტაქტიკური გამარჯვების ფონზე მერაბიშვილის მოწოდება მავნებლობაა, ივანიშვილის რეჟიმის შენარჩუნებას რომ ემსახურება.

რით ვერ გაიგეთ, რომ ოცნების ძალადობრივი მანქანა სწორედ მსგავსი რევანშისტული ძალების ხარჯზე ინარჩუნებს მმართველობას! ყველა პასუხისმგებლიანი მოქალაქე, პოლიტიკოსი მკაცრად უნდა გაემიჯნოს ქვეყნის ნორმალური, ევროპული მომავლის დამსამარებელ მსგავს მოწოდებებს და სწორად გაიაზროს, რომ საქართველოს წარმატებული, დემოკრატიული პერსპექტივა მხოლოდ მაშინ მიიღწევა, როცა წარსული და დღევანდელი რეჟიმების უსამართლობები ჩაითვლება დანაშაულებრივ ექსპერიმენტად, როცა საზოგადოება და მის მიერ დემოკრატიულად არჩეული პოლიტიკური გუნდი ბოლომდე გაემიჯნება ამ წარსულს და სრულად განიმსჭვალება საქართველოს ეროვნული, ევროპული, დემოკრატიული სულისკვეთებით!“, - წერს ახვლედიანი.