თბილისის მასშტაბით, ტაქსით მომსახურების 22 261 ნებართვაა გაცემული

დღეის მდგომარეობით, 10:00 საათის მონაცემებით, თბილისის მასშტაბით, ტაქსით მომსახურების 22 261 ნებართვაა გაცემული.

მათ შორის, როგორც „ინტერპრესნიუსს“ თბილისის მერიაში განუცხადეს, მას შემდეგ რაც ტაქსის რეფორმის მესამე ეტაპის ამოქმედება დაანონსდა, 2500-ზე მეტი ახალი ლიცენზიაა გაცემული.

ცნობისთვის, თბილისის მერიის გადაწყვეტილებით, მიმდინარე წლის 1-ელი აპრილიდან A კატეგორიის ტაქსის ლიცენზია მხოლოდ მასზე გაიცემა, ვინც 2023 წლის 20 მარტამდე, ნებისმიერ პერიოდში ერთხელ მაინც ფლობდა A კატეგორიის ნებართვას. შედეგად, A კატეგორიის ტაქსის მართვის ნებართვა, რომელიც აქამდე ერთწლიანი იყო, უვადო გახდება. ასევე, შეიქმნება A კატეგორიის ტაქსის მართვის ნებართვის ბაზარი, სადაც ნებართვით ვაჭრობა იქნება შესაძლებელი. A კატეგორია მოიცავს ქალაქში მოძრავ თეთრი ფერის ტაქსებს, რომელთაც აქვთ სპეციალური მანიშნებელი – „ტაქსი თბილისი“.