საფრანგეთში საპენსიო რეფორმის წინააღმდეგ აქციები გრძელდება, პოლიციამ დემონსტრანტების დასაშლელად ცრემლსადენი გაზი გამოიყენა
პარიზის ქუჩებში საპენსიო რეფორმის გასაპროტესტებლად ათასობით ადამიანი გამოვიდა. პარიზის ცენტრში შეკრებილ დემონსტრანტებსა და სამართალდამცველებს შორის შეტაკება მოხდა.
აქციის მონაწილეების ნაწილმა სხვადასხვა ნივთებს ცეცხლი წაუკიდა და პოლიციას პიროტექნიკა დაუშინა, რასაც სამართალდამცავებმა ცრემლსადენი გაზით უპასუხეს.
მედიის ინფორმაციით, არეულობის დროს პოლიციამ პარლამენტის შენობასთან ახლოს ათობით ადამიანი დააკავა. საპროტესტო აქციები საფრანგეთის სხვა ქალაქებშიც, მათ შორის ბორდოში, ტულონსა და სტრასბურგშიც გაიმართა.
საფრანგეთში საპროტესტო ტალღა პრეზიდენტ ემანუელ მაკრონის ნაბიჯს მოჰყვა, რომელმაც საკამათო საპენსიო რეფორმის კანონპროექტის პარლამენტში კენჭისყრის გარეშე დამტკიცების გადაწყვეტილება მიიღო. აღსანიშნავია, რომ ოპოზიციონერმა დეპუტატებმა მაკრონის მთავრობის უნდობლობის შუამდგომლობა დააყენეს, რომლის განხილვა პარლამენტში მომავალი კვირის დასაწყისში იგეგმება.
შეგახსენებთ, საფრანგეთის საპენსიო რეფორმა მინიმალური საპენსიო ასაკის 62-დან 64 წლამდე გაზრდას ითვალისწინებს.
This is a modal window.
v-if="article.gallery" v-html="article.gallery"
