ფრენებთან დაკავშირებით ევროკავშირის ელჩების დემარში აბსოლუტურად უსაფუძვლო და გაუგებარია - სამწუხაროა, როცა ჩვენი პარტნიორების მხრიდან ასეთი ნაბიჯი იდგმება, - ეს განცხადება დღეს “ქართული ოცნების“ დეპუტატმა გივი მიქანაძემ გააკეთა.

მიქანაძის თქმით, ვერავინ დაასაბუთებს, რომ საქართველო რუსეთის მიერ გამოყენებული იყო სანქციებისთვის გვერდის ასავლელად - "ეს არ მომხდარა და არც არასდროს მოხდება".

როგორც ამ კონტექსტში “ქართული ოცნების“ დეპუტატმა აღნიშნა, ევროკავშირის ელჩების ერთ ასეთ დემარშს ევროპის ადამიანის უფლებათა სასამართლომ უპასუხა.

“დემარშს ადგილი ჰქონდა იუსტიციის მინისტრთან, მიხეილ სააკაშვილთან დაკავშირებით. ამის შემდეგ ევროპული სასამართლოს გადაწყვეტილება ვნახეთ, რითაც ყველაფერს პასუხი გაეცა როგორც დემარშზე, ასევე ხელოვნურად მოგონილ ჭორებზე, რომელსაც მიხეილ სააკაშვილი, მისი ადვოკატები, ოჯახი და თანაგუნდელები ქვეყნის საზიანოდ ავრცელებდნენ. ადამიანის უფლებათა დაცვის ევროპულმა სასამართლომ მტკიცე პოზიცია დააფიქსირა და ნახეთ, რომ ენა ჩაუვარდათ.

როდესაც საუბარია ფრენების აღდგენაზე, უნდა გვახსოვდეს, რომ საზღვარი არასდროს დაკეტილა. საზღვარი მოქმედი იყო და ადამიანებს, ვისაც საქართველოში ჩამოსვლა უნდოდა, ტრანზიტულ გზებს იყენებდნენ და საქართველოში მაინც ჩამოდიოდნენ. რუსეთთან პირდაპირი ავიამიმოსვლა 2010 წელს, ჯერ კიდევ მიხეილ სააკაშვილის დროს აღდგა. მაშინ კაცი-შვილს არანაირი განცხადება არ გაუკეთებია. ფრენების აღდგენაზე გადაწყვეტილება ცალმხრივად რუსეთის ხელისუფლებამ მიიღო, ისევე როგორც რამდენიმე წლის წინ ავიამიმოსვლის შესაძლებლობა ცალმხრივად გააუქმეს. რეისებს მხოლოდ ის ავიაკომპანიები ასრულებს, რომლებიც სანქცირებულთა სიაში არ არიან შესული. ვერც ერთი ავიაკომპანია, რომელიც სანქცირებულთა სიაშია, ავიამიმოსვლას ვერ განახორციელებს“, - განაცხადა გივი მიქანაძემ.