ოლაფ შოლცი - კახოვკას ჰესის აფეთქება ომის ახალი განზომილებაა
გერმანიის კანცლერი, ოლაფ შოლცი კახოვკას ჰიდროელექტროსადგურის აფეთქებას უკრაინის წინააღმდეგ რუსეთის ომის ახალი განზომილებად აფასებს.
უკრაინული მედიის ინფორმაციით, შოლცმა ასეთი განცხადება ბერლინში გამართულ ფორუმზე გააკეთა.
მისი თქმით, ჰიდროელექტროსადგურის აფეთქება „შეესაბამება იმ გზას, რითაც პუტინი ამ ომს აწარმოებს“.
უკრაინული მედია წერს, რომ გერმანიის კანცლერმა თავი აარიდა რუსეთის პირდაპირ დადანაშაულებას, მაგრამ აღნიშნა, რომ რუსეთის ჩართულობის ნიშნები არსებობს.
ოლაფ შოლცმა ხაზი გაუსვა, რომ რუსეთი გამუდმებით ესხმის თავს სამოქალაქო ობიექტებს - ქალაქებს, სოფლებს, საავადმყოფოებს, სკოლებს, ინფრასტრუქტურულ ობიექტებს.
„ამიტომ არის ასე მნიშვნელოვანი, რომ უკრაინას მხარი დავუჭიროთ - ფინანსური თვალსაზრისით და ასევე, იარაღის მიწოდებით", - აღნიშნა გერმანიის კანცლერმა.
v-if="article.gallery" v-html="article.gallery"
