ლაშა ხუციშვილი „ქართული ოცნების“ მხრიდან განსაკუთრებული ლოიალურობით გამოირჩევა. მის ოჯახს, ოთხ სხვადასხვა საარჩევნო პერიოდში, მმართველი გუნდისთვის შეწირული აქვს 100 ათას ლარზე მეტი , - ამის შესახებ ოპოზიციონერმა დეპუტატმა ხატია დეკანოიძემ პლენარულ სხდომაზე განაცხადა.

მისივე თქმით, ლაშა ხუციშვილის ოჯახს სალომე ზურაბიშვილის 2018 წლის საპრეზიდენტო არჩევნებისას მმართველი გუნდისთვის 10 ათასი ლარი აქვს შეწირული.

„დღეს ნამდვილად ის დღეა, როდესაც საქართველოს პრეზიდენტის წარმომადგენელმა, სასესიო დარბაზში, ტრიბუნასთან, დაადასტურა და იმედი მაქვს, ამაზე პრეზიდენტიც ისაუბრებს, რომ ნამდვილად ხდებოდა მასზე შანტაჟი, ზეწოლა. ეს შანტაჟი და ზეწოლა იყო მხოლოდ და მხოლოდ იმისთვის, რომ „ქართული ოცნებისა“ და ბიძინა ივანიშვილისთვის სასურველი ადამიანი საქართველოს ეროვნული ბანკის პრეზიდენტი ყოფილიყო. ანუ ეს კანდიდატურა ყოფილა საქართველოს ფინანსთა მინისტრი, ლაშა ხუციშვილი, რომელიც „ქართული ოცნების“ მხრიდან განსაკუთრებული ლოიალურობით გამოირჩევა, რომლის ოჯახსაც, აუდიტის სამსახურის ცნობების თანახმად, ოთხ სხვადასხვა საარჩევნო პერიოდში, მმართველი გუნდისთვის შეწირული აქვს 100 ათას ლარზე მეტი. ირონიაა, მაგრამ უნდა ვთქვათ, რომ ლაშა ხუციშვილის ოჯახს, სალომე ზურაბიშვილის 2018 წლის საპრეზიდენტო არჩევნების დროს 10 ათასი ლარი აქვს შეწირული. გარდა ამისა, მისი ოჯახი ძალიან მჭიდრო კავშირში იყო „ქართუსთან“ და ბიძინა ივანიშვილთან. ის არის ფინანსთა მინისტრი, რომლის მიმართაც არის ძალიან სერიოზული კითხვები. ეს ადამიანი პასუხისმგებელია, მათ შორის საქართველოს ფისკალურ პოლიტიკაზე, მათ შორის იმაზე, რომ „ქართული ოცნების“ ყველა ნება- სურვილი შესრულდეს ფინანსთა სამინისტროში. ძალიან ბევრი მიმართულებით ეს ადამიანი იჩენს ძალიან სერიოზულ დამოკიდებულებას „ქართული ოცნების“ მიმართ. რაც მე ჩამოვთვალე, არ არის გასაკვირი, რომ ეროვნული ბანკის პრეზიდენტად „ქართულ ოცნებას“ ასეთი დაჟინებული მოთხოვნა აქვს, რომ ლაშა ხუციშვილი დაინიშნოს. სწორედ ამიტომ აპირებს ვეტოს დაძლევას. თავის მოტყუებას არ აქვს აზრი, მმართველი პარტიის პირობებში არავითარი დამოუკიდებელი სახელმწიფო ინსტიტუტები არ იარსებებს, მათ შორის ეროვნული ბანკი, პროკურატურა, არცერთი სამინისტრო. ერთადერთი გამოსავალი არის ის, რომ „ქართული ოცნება“ აღარ იყოს ხელისუფლებაში“, - განაცხადა ხატია დეკანოიძემ.