სრულიად უდანაშაულო ადამიანს რატომ მამყოფებთ ამდენი ხანი ამ უბედურებაში? - შეგიძლიათ ჩემი სხეული გაანადგუროთ, მაგრამ ჩემს სულს ვერაფერს დააკლებთ, ჩემს შეხედულებებს ვერაფერს დააკლებთ და ჩვენ ერთად გავიმარჯვებთ! - ამის შესახებ საქართველოს ყოფილმა პრეზიდენტმა მიხეილ სააკაშვილმა სასამართლო პროცესის მიმდინარეობისას დისტანციურად ჩართვისას განაცხადა.

სააკაშვილის თქმით, მას შეიძლება დანაშაული მიუძღოდეს საკუთარი ახლობლებისა და ოჯახის წევრების მიმართ, მაგრამ არავითარი დანაშაული არ მიუძღვის ქვეყნისა და ხალხის წინაშე.

„სრულიად უდანაშაულო ადამიანს რატომ მამყოფებთ ამდენი ხანი ამ უბედურებაში?- თითოეულმა დავუსვათ ჩვენს თავს კითხვა. არაფერი ისეთი არ გამიკეთებია, დანაშაული შეიძლება მიმიძღვის ჩემს ახლობლებთან, ოჯახის წევრებთან, საქართველოსა და ქართველი ხალხის წინაშე დანაშაული არ ჩამიდენია, საქართველოს არ ჰყოლია დამნაშავე პრეზიდენტი. 2003 წელს, „ვარდების რევოლუციის“ დროს, გადავარჩინეთ საქართველოს სახელმწიფოებრიობა, მოვსპეთ კორუფცია, მოვსპეთ კრიმინალი და ახლა კორუფცია, კრიმინალი იძიებს ჩემზე შურს, ეს არის და ეს რაც ხდება. ეს არის, ჩვეულებრივად, პუტინის, კორუფციის კრიმინალის, ოლიგარქატის შურისძიება ჩემზე, ერთ ცალკე აღებულ მიხეილ სააკაშვილზე. შეგიძლიათ ჩემი სხეული გაანადგუროთ, მაგრამ ჩემს სულს ვერაფერს ვერ დააკლებთ, ჩემს შეხედულებებს ვერაფერს ვერ დააკლებთ და ჩვენ ერთად გავიმარჯვებთ! მაგრად დადექით! მაგრად იყავით!” - განაცხადა სააკაშვილმა.