ვოლოდიმირ ზელენსკი ემანუელ მაკრონს ზაპოროჟიეს ატომურ ელექტროსადგურზე რუსების მხრიდან მოსალოდნელ პროვოკაციებზე ესაუბრა
უკრაინის პრეზიდენტი, ვოლოდიმირ ზელენსკი საფრანგეთის პრეზიდენტს, ემანუელ მაკრონს ესაუბრა.
უკრაინის პრეზიდენტის ადმინისტრაციის ინფორმაციით, მხარეებმა განიხილეს თავდაცვის შეთანხმებების შესრულება და ახლებზე შეთანხმდნენ. ასევე, უკრაინისა და საფრანგეთის პრეზიდენტებმა დეტალურად განიხილეს ფრონტზე არსებული მდგომარეობა და რუსეთში ბოლო დროს განვითარებული მოვლენები.
„პრიგოჟინის ქმედებების შემდეგ მთელმა მსოფლიომ დაინახა, რომ რუსეთს ბრძოლის ველზე მანევრირების ადგილი არ აქვს. პირიქით, ჩვენთვის იხსნება შესაძლებლობების ფანჯარა. უნდა ვიმოქმედოთ გადამწყვეტად როგორც სამხედრო, ასევე პოლიტიკური თვალსაზრისით“, - აღნიშნა ზელენსკიმ.
მხარეებმა ასევე განიხილეს მოლოდინები ვილნიუსის სამიტიდან და უკრაინის უსაფრთხოების გარანტიებით უზრუნველყოფა ალიანსისკენ მიმავალ გზაზე.
„უკრაინის პრეზიდენტმა ემანუელ მაკრონი გააფრთხილა, რომ რუსეთის საოკუპაციო ჯარები ზაპოროჟიეს ატომურ ელექტროსადგურზე საშიში პროვოკაციებისთვის ემზადებიან. ორი ლიდერი შეთანხმდა, ითანამშრომლონ ატომური ენერგიის საერთაშორისო სააგენტოსთან, რათა ელექტროსადგურზე ვითარების კონტროლი განხორციელდეს“, - აცხადებენ უკრაინის პრეზიდენტის ადმინისტრაციაში.
v-if="article.gallery" v-html="article.gallery"
