თორნიკე რიჟვაძე თურქეთში ქართული დიასპორის წარმომადგენლებს შეხვდა და საერთაშორისო ფესტივალ ,,ჩვენებურების" საზეიმო გახსნაში მიიღო მონაწილეობა
აჭარის მთავრობის თავმჯდომარე თორნიკე რიჟვაძემ, თურქეთის რესპუბლიკაში ვიზიტის ფარგლებში, შეხვედრები გამართა თურქეთის კავკასიურ-ქართული ასოციაციების ფედერაციაში დიასპორულ ორგანიზაციებთან და თურქეთში მცხოვრებ ქართველებთან. ინფორმაციას აჭარის მთავრობის პრესსამსახური ავრცელებს.
მათი ინფორმაციით, თორნიკე რიჟვაძემ საერთაშორისო ფესტივალ ,,ჩვენებურების" საზეიმო გახსნაში მონაწილეობა მიიღო და დამსწრე საზოგადოებას სიტყვით მიმართა.
„აჭარის მთავრობის მეთაურმა ხაზი გაუსვა ფესტივალის და ქართული დიასპორული ორგანიზაციების საქმიანობის მნიშვნელობას, რაც არსებითია როგორც ქართული კულტურისა და ტრადიციების პოპულარიზაციის, ისე ორ ქვეყანას შორის არსებული ურთიერთობების კიდევ უფრო განვითარებისთვის.
კავკასიურ-ქართული ასოციაციების ფედერაციის ორგანიზებით საერთაშორისო ფოლკლორული ფესტივალი „ჩვენებურები" არაერთი წელია იმართება. წელს ფესტივალი განსაკუთრებული მასშტაბურობით, ბურსას რეგიონის 5 მუნიციპალიტეტში იმართება. ფესტივალში მონაწილეობა აჭარის სიმღერისა და ცეკვის სახელმწიფო აკადემიურმა ანსამბლმა „არსიანმა" და თურქეთში მოღვაწე ანსამბლ „ჩვენებურებმა" მიიღეს.
ფესტივალის მიზანი თურქეთში მოქმედი ქართული დიასპორების შემოქმედების წარმოჩენა და ქართული ფოლკლორის პოპულარიზაციაა.
ფესტივალს ესწრებოდნენ აჭარის მთავრობის და ადგილობრივი ხელისუფლების წარმომადგენლები, თურქეთის ქართული დიასპორული ორგანიზაციების ხელმძღვანელები და ადგილობრივი მოსახლეობა“, - აღნიშნულია ინფორმაციაში.
v-if="article.gallery" v-html="article.gallery"
