ახლა ჩინეთთან ურთიერთობა ჩვენს დასავლელ პარტნიორებს არ უტოვებს შთაბეჭდილებას, რომ საქართველოს ევროინტეგრაცია სერიოზულად აინტერესებს , - ამის შესახებ ორგანიზაცია „გრასის“ დამფუძნებელმა, სერგი კაპანაძემ განაცხადა, რითაც საქართველოსა და ჩინეთს შორის სტრატეგიული ურთიერთობის შესახებ ხელშეკრულების გაფორმებას გამოეხმაურა.

როგორც კაპანაძემ „პალიტრანიუსის“ გადაცემა „რეზიუმეში“ განაცხადა, ჩინეთთან ურთიერთობა ცუდი არ არის, პრობლემა არის კონტექსტი ე.წ. სტრატეგიული პარტნიორობის, რომელიც კითხვებს აჩენს.

„საბოლოო ჯამში, ეს რასაც პრობლემას უქმნის არის ის, თუ როგორი აღქმა რჩებათ ჩვენს პარტნიორებს და როგორ იცვლება ჩვენი ვექტორი. აქამდე, ჩვენ ჩინეთთან ამ ერთ სიბრტყეში არ ვიყავით, ბევრი მოსაზრების გამო, მათ შორის, იმის გამო, რომ ჩინეთი აშშ-ს და ევროპის მოწინააღმდეგე ძალად ითვლება, განსხვავებული ვექტორია.

დეკლარირებულად, ჩინეთი და რუსეთი გმობენ ნატოს გაფართოებას. არ შეიძლება სტრატეგიული პარტნიორი ერქვას იმ ქვეყანას, რომელიც შენი კონსტიტუციით განსაზღვრული საგარეო პოლიტიკური მიზნის მკვეთრი მოწინააღმდეგეა. როდესაც სტრატეგიულ პარტნიორობაზე საუბრობენ, ეს სერიოზულ კითხვის ნიშნებს ბადებს და სერიოზულ ეჭვს.

აქამდე, ჩვენ სტრატეგიული პარტნიორობა განსაზღვრული გვქონდა აშშ-თან, ევროკავშირთან, უკრაინასთან და თურქეთთან. თუ ყველასთან სტრატეგიული პარტნიორობა გაქვს ე.ი. დამაბნეველი და გაურკვეველი საგარეო პოლიტიკა გაქვს“, - განაცხადა კაპანაძემ.

კითხვაზე, რამდენად არის ჩინეთთან დაახლოება პრობლემა ევროინტეგრაციის გზაზე, კაპანაძე პასუხობს, რომ ეს პრობლემაა, რადგან ჩინეთის დეკლარირებული საგარეო პოლიტიკური მიზნები არ არის თანხვედრაში საქართველოს დეკლარირებული საგარეო პოლიტიკურ მიზნებთან.

„რა თქმა უნდა, პრობლემაა. ევროკავშირისთვის და ამერიკისთვის პრობლემაა ამ ხელისუფლების დამოკიდებულება რუსეთთან მიმართებაში. ახლა ჩინეთთან ურთიერთობა ჩვენს დასავლელ პარტნიორებს არ უტოვებს შთაბეჭდილებას, რომ საქართველოს ევროინტეგრაცია სერიოზულად აინტერესებს.

ჩინეთი არის ქვეყანა, რომლის დეკლარირებული საგარეო პოლიტიკური მიზნები არ არის თანხვედრაში ჩვენი ქვეყნის დეკლარირებული საგარეო პოლიტიკურ მიზნებთან. ნებისმიერი არადასავლური, საბოლოო ჯამში აღმოჩნდება პრორუსული. ამ კონტექსტში და ამ რეგიონში ჩინეთი არ არის რუსეთის მოწინააღმდეგე“,- განაცხადა სერგი კაპანაძემ.