პარლამენტის საგარეო ურთიერთობათა კომიტეტის თავმჯდომარემ და იაპონიასთან საპარლამენტო მეგობრობის ჯგუფის ხელმძღვანელმა ნიკოლოზ სამხარაძემ, იაპონიაში ვიზიტის ფარგლებში, ტოკიოს გეო-ეკონომიკის ინსტიტუტში შავის ზღვის უსაფრთხოების საკითხებზე სემინარი ჩაატარა. ამის შესახებ ინფორმაციას პარლამენტის პრესსამსახური ავრცელებს.

მათივე ცნობით, ნიკოლოზ სამხარაძემ იაპონიის ერთ-ერთ წამყვან საექსპერტო-კვლევით ორგანიზაციაში გამართულ სემინარზე, შავი ზღვის რეგიონში არსებული ვითარების გამომწვევი მიზეზები მიმოიხილა.

„სემინარზე ყურადღება გავამახვილეთ რუსეთის მიერ საქართველოსა და უკრაინის წინააღმდეგ განხორციელებულ აგრესიაზე, სომხეთ-აზერბაიჯანის კონფლიქტზე და საქართველოს სამშვიდობო როლზე ამ კონფლიქტის მოგვარებაში, ნატოსა და ევროკავშირის ჩართულობაზე შავი ზღვის უსაფრთხოების საკითხებში და ზოგადად, შავი ზღვის უსაფრთხოების მნიშვნელობაზე ევროპული და გლობალური უსაფრთხოებისთვის", - განაცხადა ნიკოლოზ სამხარაძემ.

მოხსენების შემდეგ შეხვედრა დისკუსიის რეჟიმში გაგრძელდა. სემინარში მონაწილეობდნენ იაპონელი პროფესორები, მკვლევრები და ჟურნალისტები.