სავალდებულოსი რა გითხრათ, თუმცა სასამართლოსთვის უკეთესია, უფრო კარგად რომ გამოიკვლიოს, - ასე უპასუხა საკონსტიტუციო სასამართლოს მოსამართლე გიორგი კვერენჩხილაძემ კითხვას, სავალდებულოა თუ არა საქართველოს პრეზიდენტის დასწრება მისი იმპიჩმენტის თაობაზე კონსტიტუციური წარდგინების განსახილველ სხდომაზე.

ამასთან, კითხვაზე, მივა თუ არა პრეზიდენტი დღეს საკონსტიტუციო სასამართლოში, კვერენჩხილაძე ამბობს, რომ ინფორმაცია არ აქვს.

„მესმის, საზოგადოების მაღალი ინტერესი, მაგრამ არცერთ სახელმწიფოში მოსამართლეს არ ეკითხებიან განხილვის ეტაპზე მყოფი საქმის დეტალებს“,- განუცხადა კვერენჩხილაძემ ჟურნალისტებს.

შეგახსენებთ, რომ დღეს საკონსტიტუციო სასამართლომ პრეზიდენტის იმპიჩმენტის თაობაზე კონსტიტუციურ წარდგინებას ზეპირი მოსმენით უნდა განიხილოს. სხდომა 12:00 საათზეა ჩანიშნული. საკონსტიტუციო სასამართლოში პრეზიდენტ სალომე ზურაბიშვილის ინტერესებს იურისტები თამარ ჩუგოშვილი და მაია კოპალეიშვილი დაიცავენ.

არსებული ინფორმაციით, სხდომას „ქართული ოცნებიდან“ - პარტიის თავმჯდომარე ირაკლი კობახიძე უნდა დაესწროს.

„საქართველოს საკონსტიტუციო სასამართლომ, 2023 წლის 22 სექტემბრის №3/2/1797 საოქმო ჩანაწერით, არსებითად განსახილველად მიიღო №1797 კონსტიტუციური წარდგინება („საქართველოს პარლამენტის წევრების (ირაკლი კობახიძის, შალვა პაპუაშვილის, მამუკა მდინარაძის და სხვების, სულ 80 წევრის) კონსტიტუციური წარდგინება საქართველოს პრეზიდენტის მიერ საქართველოს კონსტიტუციის სავარაუდო დარღვევის საკითხზე“).

№1797 კონსტიტუციური წარდგინებაში განხილვის საგანს წარმოადგენს საქართველოს კონსტიტუციის 52-ე მუხლის პირველი პუნქტის „ა“ ქვეპუნქტის შესაძლო დარღვევა, საქართველოს პრეზიდენტის მიერ საქართველოს მთავრობის თანხმობის გარეშე, საგარეო ურთიერთობებში წარმომადგენლობითი უფლებამოსილების განხორციელების გამო, რაც გამოიხატა საზღვარგარეთ სამუშაო ვიზიტების განხორციელებით და ოფიციალურ პირებთან სამუშაო შეხვედრებისა და მოლაპარაკებების გამართვით.

№1797 კონსტიტუციური წარდგინების არსებითი განხილვა ზეპირი მოსმენით გაიმართება 2023 წლის 3 ოქტომბერს, 12:00 საათზე, წარდგინების ავტორთა და საქართველოს პრეზიდენტის მონაწილეობით", - წერია ინფორმაციაში.

მმართველი გუნდის მიერ ზურაბიშვილის წინააღმდეგ იმპიჩმენტის პროცესის დაწყების საფუძველი პრეზიდენტის მიერ განხორციელებული ის საგარეო ვიზიტები გახდა, რაზეც მთავრობამ სალომე ზურაბიშვილს თანხმობა არ მისცა. პრეზიდენტის თანამდებობიდან იმპიჩმენტის წესით გადაყენების საკითხი 1-ელ სექტემბერს, პარტია „ქართული ოცნების“ პოლიტსაბჭოს სხდომაზე გადაწყდა. საკონსტიტუციო სასამართლოს დასკვნის მოსამზადებლად ერთთვიანი ვადა აქვს. სასამართლოს მიერ დადებითი დასკვნის შემთხვევაში, პრეზიდენტის გადასაყენებლად 100 დეპუტატის ხმა არის საჭირო, რაც „ქართული ოცნების“ უმრავლესობას არ გააჩნია.