ფარმაცევტული კომპანიების ასოციაცია მთავრობის საკანონმდებლო ინიციატივაში „სახელმწიფო აფთიაქის შექმნისა“ და სახელმწიფოს ფარმაცევტულ სფეროსთან კონკურენციაში შესვლის საფრთხეს ხედავს.

"წამლისა და ფარმაცევტული საქმიანობის შესახებ" კანონში შესატანი ცვლილებების კანონპროექტი დარგობრივი ეკონომიკისა და ეკონომიკური პოლიტიკის კომიტეტმა განიხილა, სადაც ფარმაცევტული კომპანიების ასოციაციის წარმომადგენლები, კანონის მიღების შემთხვევაში, გარკვეულ პრობლემებზე საუბრობდნენ.

როგორც ფარმაცევტული კომპანიების ასოციაციის ხელმძღვანელი, ილონა კოკიაშვილი აცხადებს, სახელმწიფო, რომელიც ინოვაციურ მედიკამენტებთან ერთად, არა ინოვაციური მედიკამენტების შესყიდვასაც აპირებს, ფაქტობრივად „სახელმწიფო აფთიაქის შექმნაა“ და ამით ის ფარმაცევტულ სფეროსთან პირდაპირ კონკურენციაში შედის.

„თუ ჩვენ თავად განმარტებით ბარათს ჩავხედავთ, რომელიც განმარტავს ყველა იმ ჩანაფიქრს, რაც, ამ ეტაპზე, აქვს სამინისტროს, ძალიან საშიში ფაქტის წინაშე ვდგებით. ჩანაწერს, ფაქტობრივად, ერთი წინადადება აკლია, რომ სამინისტრო აპირებს რაღაც სახელმწიფო აფთიაქის შექმნას და გადადის გეგმურ მართვაზე. კომპანიასთან მოლაპარაკება უკვე დაწყებულია. ჩვენი ინფორმაციით, უკვე არსებობს კონკრეტული სიები, რომელზეც მიდის მოლაპარაკება, მათ შორის, განიხილება არაინოვაციური მედიკამენტებიც. რატომ არის განმარტებით ბარათში მითითებული, რომ ინოვაციური მედიკამენტების გარდა, თქვენ აპირებთ ამავე კომპანიის სხვა მედიკამენტების შემოტანას? ეს ხომ პირდაპირ კონკურენციაში შემოსვლაა, თუნდაც მთელ სააფთიაქო სისტემასა და ჩვენს სექტორთან. ანუ ჩვენ არაკონკურენტულ გარემოში ვვარდებით სახელმწიფოსთან. გამოდის, რომ სახელმწიფო პირდაპირ კონკურენციაშია დარგთან. დღეს ეს შეიძლება შეეხოს ონკოლოგიის პროგრამას, ხვალ ეს გავრცელდება სხვა პროგრამაზე, ზეგ სხვაზე და ანუ რა გამოდის? ჩვენი დარგი, ფაქტობრივად, ჩერდება. რა უნდა ვუყოთ იმ ნაშთებს, რომლებიც უკვე მილიონობით აქვს კომპანიებს შემოტანილი? რას ვუშვებით? ჩვენ 1-ელი ნოემბრიდან ან 1-ელი დეკემბრიდან, ფაქტობრივად, ფაქტის წინაშე ვდგებით, რა გავუკეთოთ მილიონიან ნაშთებს?!“- განაცხადა ილონა კოკიაშვილმა.

ილონა კოკიაშვილს, კომიტეტის სხდომაზე ჯანდაცვის მინისტრის მოადგილემ, თამარ გაბუნიამ უპასუხა და აღნიშნა, რომ ბაზარზე მართული შესვლის შეთანხმება ინოვაციურ მედიკამენტებს შეეხება, თუმცა სხვა მედიკამენტებთან მიმართებით, ეს ამ მექანიზმის არაპირდაპირი ეფექტია.

„რას ნიშნავს ინოვაციურ პროდუქტთან ერთად კიდევ სხვა პროდუქტების შესყიდვა? ეს მექანიზმი, ბაზარზე მართული შესვლის შეთანხმება ინოვაციურ მედიკამენტებს შეეხება. რაც შეეხება სხვა მედიკამენტებს, ეს არის არაპირდაპირი ეფექტი ამ მექანიზმის, როდესაც ქვეყანა მწარმოებელთან მოლაპარაკებას აწარმოებს ძვირადღირებულ მედიკამენტებზე. აქ არ არის საუბარი 10-20 ლარიანზე, აქ არის საუბარი მედიკამენტებზე, რომლებიც, წლის განმავლობაში, შესაძლოა, თითოეული პაციენტისთვის ნახევარი, ერთი მილიონი ღირდეს. აქ მწარმოებელი მეტად დაინტერესებულია ფასდათმობა გააკეთოს სხვა მედიკამენტებზე, რომელიც სტანდარტული შესყიდვის პირობების ფარგლებშია შესყიდული. ეს არ არის მართული შესვლის შეთანხმების ნიშანი, ეს ფოკუსირებულია მხოლოდ ინოვაციურ მედიკამენტებზე. ეს მედიკამენტები, რომელიც ამ გზით უნდა იყიდოს სახელმწიფომ, მათი შესყიდვა აქამდეც სახელმწიფოს მიერ ხდებოდა. იშვიათი დაავადებების მედიკამენტები ბაზარზე სად გახსენდებათ რომ გვაქვს? კიბოს საწინააღმდეგო მედიკამენტებს სახელმწიფო იყიდის და იყიდის იმ ფასად, რა ფასიც იქნება პაციენტისთვის სასარგებლო და სიცოცხლის გადამრჩენელი“,- განაცხადა თამარ გაბუნიამ.

ცნობისთვის, ცვლილება "წამლისა და ფარმაცევტული საქმიანობის შესახებ" კანონში და ასევე "სახელმწიფო შესყიდვების შესახებ" კანონში შედის, რაც სახელმწიფოს აძლევს შესაძლებლობას, შეიძინოს ინოვაციური (ახალი ორიგინალური) ფარმაცევტული პროდუქტი სპეციალური პირობებით, მწარმოებელთან ან სავაჭრო ლიცენზიის მფლობელთან პირდაპირი მოლაპარაკების გზით.