საქართველოში ისრაელის ელჩი - ისრაელი ელოდება, რომ საერთაშორისო საზოგადოება დაგმობს ტერორიზმს, დაგმობს „ჰამასს“ და დადგება ისრაელის გვერდით

ისრაელში მიმდინარეობს ომი, ომი ტერორიზმის წინააღმდეგ. ისრაელს მტკიცედ აქვს გადაწყვეტილი უზრუნველყოს მშვიდობა და უსაფრთხოება ჩვენს ტერიტორიაზე, - ამის შესახებ საქართველოში ისრაელის ელჩმა, ჰადას მეიცადმა ჟურნალისტებს პარლამენტის საგარეო ურთიერთობა კომიტეტის სხდომაზე დასწრების შემდეგ განუცხადა.

„დარწმუნებული ვარ, საქართველოში ყველამ დაინახა და გაიგო იმ სისასტიკისა და საშინელებების შესახებ რაც მოხდა. ჩვენ ვნახეთ ის, რაც არავინ არასდროს უნდა ნახოს. დეტალებში შესვლა არ მინდა, მაგრამ დარწმუნებული ვარ, ის საფრთხე, რაც ჩვენს ხალხს ემუქრება აღმოიფხვრება. ტერორიზმის წინააღმდეგ ამ ომში დგახარ ისრაელის გვერდით, ან ტერორიზმის გვერდით, შუა გზა არ არსებობს. ძალიან ვაფასებ საქართველოს მხარდაჭერას, ოფიციალურ მხარდაჭერას, ინსტიტუციურ მხარდაჭერას. პრემიერ-მინისტრის, პრეზიდენტის, პარლამენტის თავმჯდომარის, ბევრი პარტიის ლიდერის, კერძო კომპანიების, ადამიანების განცხადებები, რომლებიც მხარდაჭერას გამოხატავენ და ეს ძალიან ამაღელვებელია, ვინაიდან ახლა ძალიან რთული დრო გვიდგას“, - აღნიშნა ელჩმა.

მისი თქმით, კომიტეტის სხდომაზე ისაუბრა იმ ურთიერთობებზე, რაც, მისი თქმით, „ჰამასსა“ და ირანს შორის არსებობს.

„დღევანდელ შეხვედრაზე მქონდა შესაძლებლობა მესაუბრა ღაზას სექტორში მოქმედ „ჰამასსა“ და „ისლამურ ჯიჰადსა“ და ირანს შორის ძლიერ ურთიერთობებზე, იქნება ეს ფინანსური თუ ლოგისტიკური მხარდაჭერა, წვრთნების კუთხით მხარდაჭერა და მეჩვენებინა კომიტეტის წევრებისთვის ინფორმაცია ირანსა და ამ სასტიკ ტერორისტულ ორგანიზაციებს შორის ხანგრძლივი ურთიერთობების შესახებ. „ჰამასსა“ და „ისლამურ სახელმწიფოს“ შორის განსხვავება არ არსებობს. ისრაელი ელოდება, რომ მთელი საერთაშორისო საზოგადოება დაგმობს ტერორიზმს, დაგმობს „ჰამასს“, დადგება ისრაელის გვერდით, რადგან ჩვენ ვაკეთებთ იმას, რასაც უნდა ვაკეთებდეთ ჩვენი მოქალაქეებისა და სახელმწიფოს დასაცავად“, - აღნიშნა ელჩმა.

ლევან ლორთქიფანიძე - დასავლეთის მკაცრი, მიზანმიმართული გადაწყვეტილებები, ივანიშვილს აგრძნობინებს, რომ მან ადრე ჩამოწერა აშშ და ევროკავშირი, რომ დასავლეთი არ აპირებს ხელი აიღოს თავის ინტერესებზე სამხრეთ კავკასიაში
ქართული პრესის მიმოხილვა 18.07.2024
კავკასიის ტექნოლოგიების სკოლა და კომპანია „პარვუს ჯგუფი“ აბიტურიენტებს და დაინტერესებულ პირებს ენერგეტიკისა და ელექტროინჟინერიის ახალი საბაკალავრო პროგრამის პრეზენტაციაზე იწვევს
კავკასიის მედიცინის ცენტრი JCI აკრედიტებული პირველი მულტიპროფილური რეფერალური ჰოსპიტალი გახდა ქვეყანაში
მეხუთე თაობის „სანტა ფე“ - მზად ნებისმიერი თავგადასავლისთვის