„ქართული ოცნების“ აღმასრულებელმა მდივანმა, მამუკა მდინარაძემ განმარტა, რა საკითხებს განიხილავს მიმდინარე კვირაში საქართველოს პარლამენტი.

მდინარაძის ინფორმაციით, მიმდინარე კვირაში დაგეგმილია სუს-ის, ასევე სახალხო დამცველის ანგარიშის მოსმენა.

ამასთან, საქართველოს პარლამენტში შედგება „მინისტრის საათის“ ფორმატში თავდაცვის მინისტრის, ჯუანშერ ბურჭულაძის მოსმენა, ხოლო ინტერპელაციის წესით საგარეო საქმეთა მინისტრს მოუსმენენ.

„მიმდინარე კვირაში პრეზიდენტის იმპიჩმენტის საკითხს განიხილავს საქართველოს პარლამენტი. ასევე, მოისმენს სახელმწიფო უსაფრთხოების სამსახურის ხელმძღვანელის ანგარიშს. იქნება თავდაცვის მინისტრის საათი. სახალხო დამცველის ანგარიშს მოვისმენთ და კვირის ბოლომდე იქნება საგარეო საქმეთა მინისტრის ინტერპელაცია. დატვირთული კვირა გვაქვს, როგორც ხედავთ“, - განაცხადა მდინარაძემ.

მისივე თქმით, პარლამენტი იმსჯელებს „მაუწყებლის შესახებ კანონში“ შესატან ცვლილებებზე.

„ამასთან დაკავშირებით დღეს ირაკლი კობახიძემ გაახმოვანა ინფორმაცია და გავიმეორებ, რომ ჩვენ ევროკომისიას ვუგზავნით სამ შესაძლო თეორიულ ვარიანტს, რაც კი შეიძლება გამომდინარეობდეს იმ ევროდირექტივებიდან, რომელიც თავად კომისიის მხრიდან იქნა მოწოდებული, როგორც წერილობითი, ასევე, ზეპირი კომუნიკაციის ფორმით და მივიღებთ იმ ვარიანტს, რომელსაც ამოარჩევენ ევროკომისიის წარმომადგენლები. ამიტომ, აქ კითხვები არ არის და სხვათა შორის ძალიან, პრინციპულად მიუღებელი იყო პირდაპირ რომ ვთქვათ, პიარ კამპანიის აწევა ამასთან დაკავშირებით ჩვენი ოპონენტების და მისი მედიასაშუალებების მხრიდან: პირველი, რატომ „ჩქარობს ქართული ოცნება“. მაშინ, როდესაც ძალიან მოკლე ხანში უნდა გამოქვეყნდეს ევროკომისიის დასკვნა, „რატომ ჩქარობს“, ეს კითხვა აბსოლუტურად არარელევანტურია. მეორე, კრიტიკულ შენიშვნებს გამოთქვამდნენ იმ საკთხთან დაკავშრებით, რაზეც ევეროკომისიამ პირდაპირ დირექტივა მოგვცა. აქედან გამომდინარე, ჯობს ჯერ წაიკითხონ ხოლმე, რაშია საქმე შემდეგ გააპროტესტონ ესა თუ ის საკითხი, თუნდაც მის ვადასთან დაკავშირებით“, - აღნიშნა მდინარაძემ.