გვაჩვენონ დოკუმენტი, სად არის დადებითი შეფასება. გვანახონ და გასაგებია, გავიგებთ პოზიციას, - ამის შესახებ „ლიბერალური აკადემიის“ დირექტორმა ლაშა ტუღუშმა „პალიტრანიუსის“ გადაცემაში „რეზიუმე“ “მაუწყებლის შესახებ“ კანონში ცვლილებებთან დაკავშირებით განაცხადა და გამოეხმაურა “ქართული ოცნების“ თავმჯდომარის, ირაკლი კობახიძის განცხადებას, რომელმაც აღნიშნა, რომ კანონში ცვლილებები არის ევროკავშირის "დირექტივა" და "არჩევანი".

ტუღუშის თქმით, საზოგადოებისთვის საინტერესო იქნება, თუკი გამოქვეყნდება დოკუმენტი, სადაც კანონპროექტზე დადებითი შეფასება იქნება.

„თუ არის ოფიციალური პოზიცია, იქნება წერილიც. თქვენ გინახავთ წერილი?- გამოგიგზავნონ, დაბეჭდონ, გამოაქვეყნონ. სად არის ეს წერილი. ასე ყველას შეუძლია ყველაფრის თქმა. ეს არის ძალიან პრინციპული საკითხი, როცა ჩვენ ვაკრიტიკებთ მიდგომებს, ვლაპარაკობთ, რომ საფრთხეები და რისკებია. თუ ევროპული მხარე, ევროკომისიის სახით ეუბნება, რომ „ეს მიიღეთ“ და არსებობს, რა პრობლემაა... ჩვენ ვაგზავნით კანონპროექტებს, იქიდან გვიბრუნდება პოზიცია, ჯერჯერობით აღფრთოვანებული დასკვნები არ შემხვედრია. კი, არის, რომ რაღაცა პროგრესია, მაგრამ ყოველთვის არის, „მაგრამ“. ვფიქრობ საზოგადოებისთვის საინტერესო იქნება, თუ მოხერხდება ამ დოკუმენტის გამოქვეყნება“, - აღნიშნა ტუღუშმა.

უშუალოდ კანონპროექტის შინაარსობრივ მხარეზე საუბრისას, რომლის თანახმად, სიძულვილის ენისა და ტერორიზმისკენ მოწოდების შემცველი პროგრამა და რეკლამა კომუნიკაციების კომისიის რეგულირების სფეროში ექცევა, ტუღუშმა აღნიშნა, რომ განმარტებები, რომელიც კანონშია მოცემული, „ძალიან ფართო ინტერპრეტაციის შესაძლებლობას“ იძლევა.

„როდესაც ეს თვითრეგულირებიდან რეგულირებაში გადავა, რა თქმა უნდა, ძალიან დიდ რისკებს შეიცავს. საფრთხის განცდა, რომელიც დღეს გაუჩნდა მედიის ძალიან ბევრ წარმომადგენელს, არა მარტო მედიის, არამედ სამოქალაქო საზოგადოების, აბსოლუტურად საფუძვლიანია. ამიტომაც არის პროტესტის განცდა“, - განაცხადა მან.

შეგახსენებთ, პარლამენტმა “მაუწყებლის შესახებ“ კანონში ცვლილებები მესამე მოსმენით მიიღო. პარლამენტის მიერ დაჩქარებული წესით მიღებული ცვლილებების საფუძველზე სიძულვილის ენისა და ტერორიზმისკენ მოწოდების შემცველი პროგრამა და რეკლამა კომუნიკაციების მარეგულირებელი კომისიის რეგულირების სფეროში ექცევა. აღნიშნულ დარღვევაზე მაუწყებლის თვითრეგულირების ორგანოს მიერ მიღებული გადაწყვეტილების კომუნიკაციების მარეგულირებელ კომისიაში გასაჩივრება იქნება შესაძლებელი. ამასთან, პირველი მოსმენით განხილვის პროცესში პროექტის პირვანდელი ვარიანტი დაკორექტირდა და უხამსობაც თვითრეგულირებიდან რეგულირების სფეროში გადავიდა.

მანამდე "ქართული ოცნების" თავმჯდომარემ, ირაკლი კობახიძემ "მაუწყებლობის შესახებ" კანონპროექტში ცვლილებებთან დაკავშირებით ისაუბრა და განაცხადა, რომ ცვლილებები იყო ევროკავშირის "არჩევანი" და "დირექტივა".

"მე საერთოდ დეტალებიც კი არ ვიცი ამ კანონპროექტის და რატომ - არავითარი პოლიტიკური ინტერესი არ გვაქვს, არის ევროკავშირის დირექტივა, რომელიც სრულდება. ევროკავშირის არჩევანი იყო სწორედ ეს - ჯერ თვითრეგულირება, შემდეგ - კომისია, სამი ვარიანტი შევთავაზეთ და სამიდან ეს ვარიანტი აირჩიეს, ეს არ იყო ჩვენი არჩევანი, რასაც გვეტყვით იმას გავაკეთებთ - თქო ვუთხარით, ეს იყო ევროკავშირის არჩევანი და რასაც თითი დაადეს იმას ვიღებთ,"- განაცხადა კობახიძემ ცვლილებებზე საუბრისასას.