უკიდურესად მძიმე ბრალდებაა და ასე მარტივად, საყველპურო დონეზე შეიძლება არ იყოს საკმარისი, რომ შენც გაიზიარო და შენც გახდე ბრალმდებელი,- ამის შესახებ ჟურნალისტებთან საპარლამენტო უმრავლესობის დეპუტატმა, მიხეილ სარჯველაძემ ფარცხალაძის საქმესთან დაკავშირებით განაცხადა.
როგორც მან აღნიშნა, მნიშვნელოვანია მტკიცებულებები და ფაქტები, რომელიც არ აქვთ.
„ჩემთვის პერსონალურად, როგორც ამ ქვეყნის მოქალაქისთვის მნიშვნელოვანია ვიცოდე რაში გამოიხატება ეს ფაქტები, მტკიცებულებები, გარემოებები, რაზე დაყრდნობითაც შეიძლება კეთდებოდეს ასეთი შეფასებები და დასკვნები, რადგან ეს არის უკიდურესად მძიმე ბრალდება და ეს ბრალდება შეიძლება ასე მარტივად, საყველპურო დონეზე და მხოლოდ შეფასების დონეზე არ იყოს საკმარისი, რომ შენც გაიზიარო და შენც გახდე ბრალმდებელი. აუცილებელია ჩვენ გვქონდეს ინტერესი და ეს არის ჯანსაღი, რომ მაინტერესებდეს ფაქტები და მტკიცებულებები, რაზე დაყრდნობითაც შეიძლება ასეთი დასკვნების გაკეთება. როცა არ გვაქვს ეს მტკიცებულება, ეს არ არის კარგი მდგომარეობა,"- განაცხადა სარჯველაძემ.