2023 წლის 9 თვეში საქართველოს აეროპორტებში 4,6 მილიონ მგზავრს მოვემსახურეთ, ეს იმას ნიშნავს, რომ თითქმის სრულად აღდგა თბილისში მგზავრთნაკადი, მნიშვნელოვანი ზრდა გვაქვს ქუთაისში და სრული აღდგენა გვაქვს ასევე ბათუმის აეროპორტში, - ამის შესახებ ეკონომიკისა და მდგრადი განვითარების მინისტრმა ლევან დავითაშვილმა მთავრობის სხდომის შემდეგ გამართულ პრესკონფერენციაზე განაცხადა.

მისი თქმით, მიმდინარე წელს საქართველოს 3,7 მილიონი საერთაშორისო ტურისტი ჰყავდა, რაც 2019 წელთან შედარებით 91%-იანი აღდგენაა. მინისტრის განმარტებით, ის, რომ ვერ ხდება სრული აღდგენა და უფრო მეტიც, 2019 წლის შედეგების გადაჭარბება, რეგიონში არსებული ვითარებით არის განპირობებული.

„ძალიან მნიშვნელოვანი დარგია ტურიზმი საქართველოსთვის, იმიტომ, რომ ყველაზე ინკლუზიურია და დადებითი ტენდენციები ტურიზმის სექტორში, მოსახლეობის მდგომარეობაზე პირდაპირ აისახება ხოლმე. 5,6 მილიონი საერთაშორისო ვიზიტორი გვყავდა, აქედან ჩვენ იდენტიფიცირებული გვაქვს, რომ გვყავდა 3,7 მილიონამდე საერთაშორისო ტურისტი, რაც 2019 წლის მონაცემებთან მიმართებით, 91%-იანი აღდგენაა ტურიზმის კუთხით. ასევე, მნიშვნელოვანია, რომ შემოსავლებში ბოლო წლების განმავლობაში უფრო მეტია ტურიზმიდან მიღებული შემოსავალი, ვიდრე ადრე იყო, მაგრამ, რა თქმა უნდა, რაოდენობრივი აღდგენაც ძალიან მნიშვნელოვანია, იმიტომ, რომ ჩვენ ტურიზმიდან გვჭირდება კიდევ უფრო მეტი შედეგის მიღება, მათ შორის, რეგიონებში, მათ შორის, სხვადასხვა ტიპის ობიექტისთვის. ტენდენციები ნამდვილად დადებითია და ეს მიუთითებს ერთ რამეზე, რომ ჩვენ გვაქვს გამიზნული, კარგად კოორდინირებული პოლიტიკა ტურიზმისა კერძო სექტორთან, ასევე ცნობადობის კამპანიები, სადაც აქტივობას არ ვანელებთ, პირიქით, უფრო ამბიციური გეგმები გვაქვს მომავალ წლებშიც. აღსანიშნავია, რომ ერთ-ერთი ფაქტორი, რის გამოც ჩვენ არ გვაქვს სრული აღდგენა ან უფრო მეტიც, ზრდა 2019 წელთან შედარებით, ეს არის რეგიონში შექმნილი ვითარება. მათ შორის, დაკეტილი საზღვრები ტრადიციულ ბაზრებთან. ამას ისიც ადასტურებს, რომ ჩვენ ავიამგზავრების კუთხით საკმაოდ მნიშვნელოვანი ტენდენცია გვაქვს, 2023 წლის 9 თვეში საქართველოს აეროპორტებში 4,6 მილიონი მგზავრი გვყავდა, ამდენ მგზავრს მოვემსახურეთ, ეს იმას ნიშნავს, რომ თითქმის სრულად აღდგა თბილისში მგზავრთნაკადი, მნიშვნელოვანი ზრდა გვაქვს ქუთაისში და სრული აღდგენა გვაქვს ასევე ბათუმის აეროპორტში. ანუ საავიაციო გზით ტურისტების მიღება არის მაჩვენებელი იმისა, რომ ეს არის უფრო მაღალი მხარჯველობითი უნარის მქონე ტურისტი, რომელსაც მეტი შედეგი მოაქვს ჩვენს ეკონომიკაში“,- განაცხადა ლევან დავითაშვილმა.

ამასთან, როგორც ლევან დავითაშვილმა აღნიშნა, ტურიზმის ტრადიციულ ბაზრებთან მიმართებით მომავალში მეტი იქნება სამუშაო, რადგან თუნდაც ის ეფექტი აღმოიფხვრას, რომელიც შეიძლება ისრაელის ომმა მგზავრთნაკადის თვალსაზრისით გამოიწვიოს. არატრადიციული ბაზრებიდან, დავითაშვილმა ინდოეთისა და ჩინეთის მიმართულებები გამოყო.

„მიდის ინტენსიური მუშაობა იმისთვის, რომ მაქსიმალურად გამარტივდეს სავიზო პროცედურები. იცით, რომ მოხდა ელექტრონული პლატფორმის ჩამოყალიბება, თუმცა ეს საკმარისი არ არის ინდოეთთან დაკავშირებით. ამიტომ უწყებათშორისი სამუშაო ჯგუფი არსებობს, რომელზეც ჩვენ ვმუშაობთ სხვადასხვა შესაბამის სამსახურთან, რომ სავიზო პროცედურები იყოს მაქსიმალურად გამჭვირვალე და კომფორტული პოტენციური ტურისტებისთვის ინდოეთიდან. იცით, რომ ჩვენ ვიზიარებთ დამოკიდებულებას, რომ ინდოეთი საინტერესო ტურისტული ბაზარია, ამიტომ ვიმუშავეთ „ინდიგოსთან’ და გაჩნდა პირდაპირი ფრენები ინდოეთთან. ინდოეთი და ჩინეთი ორი ძალიან საინტერესო ტურისტული მიმართულებაა და მომავალ წელსაც ბევრი ღონისძიება და აქტივობა გვაქვს დაგეგმილი იმისთვის, რომ კიდევ უფრო განვავითაროთ ეს ბაზრები. ჯერ მხოლოდ საწყის ეტაპზეა და ძალიან დიდი პოტენციალი აქვს ორივე ბაზარს ტურისტული კუთხით. ასევე ტრადიციულ ბაზრებზე მეტი აქტივობა მოგვიწევს, იმისთვის, რომ გავანეიტრალოთ ის ეფექტი, რომელიც, მაგალითად, ისრაელთან დაკავშირებით შეიძლება იყოს. ამ კუთხით, ტურიზმის ადმინისტრაციას საკმაოდ მნიშვნელოვანი სამოქმედო გეგმა აქვს მომავალი წლისთვის და დარწმუნებული ვარ, რომ სიამოვნებით გაგიზიარებენ ამას“,- განაცხადა ლევან დავითაშვილმა.