თინა ხიდაშელი - სამნიძეს არავინ დაუსახელებია, კობახიძემ ჩათვალა, რომ ეს შეეძლო გამოეყენებინა მისი პარტიის შიშების პასუხად - კობახიძემ უცბად ის წყალი გადაღვარა, რომელიც, როგორც ამბობენ, ხათუნამ მათ წისქვილზე დაასხა

ხათუნა სამნიძეს არ დაუსახელებია არავინ, უბრალოდ როგორც ჩანს კობახიძემ ჩათვალა, რომ ეს განცხადება შეეძლო გამოეყენებინა მისი პარტიის პოლიტიკური შიშების პასუხად და არ გამკვირვებია, რომ მათ „ლელო“ დაასახელეს, რადგან ისინი ძალიან კარგად ხვდებიან, რომ „ლელო“ არის სწორედ ის მიზიდულობის ცენტრი, რომელსაც აქვს უზარმაზარი პოტენციალი, იმ პოლიტიკური საარჩევნო ძალის ფორმირებისთვის, რომლისაც მათ ყველაზე მეტად ეშინიათ, - ამის შესახებ ორგანიზაცია „სამოქალაქო იდეის“ თავმჯდომარე თინა ხიდაშელმა განაცხადა.

როგორც მან „პალიტრანიუსის“ გადაცემა "360 გრადუსში" აღნიშნა, ის კატეგორიულად გამორიცხავს, რომ ხათუნა სამნიძე თავის განცხადებაში „ლელოს“ გულისხმობდა.

„დღეს იყო საუბარი, რომ თითქოს ხათუნა სამნიძემ ისეთი რაღაც თქვა, რომ „ქართული ოცნების“ წისქვილზე დაასხა წყალი და „ქართული ოცნების“ საქმე გააკეთა - ეს არ არის ასე. სიმართლის თქმა, თუ ეს სიმართლეა და არის სიმართლე, რომელიც იცის ხათუნამ, არასდროს არ არის ცუდი, მაგრამ ამასობაში სწორედ ამ ჩამონათვალით, რომელიც ბატონმა კობახიძემ გვამცნო, სრულიად ერთმნიშვნელოვნად გამოჩნდა, რომ აბსოლუტურ სისულელეს საუბრობს და უცბად ის წყალი გადაღვარა, რომელიც, როგორც ამბობენ, ხათუნამ მათ წისქვილზე დაასხა.

მე არ მგონია საქართველოში ვინმე არსებობდეს, მიუხედავად იმისა ხმას ვის აძლევენ და ვინ მოსწონთ, ვინც დაიჯერებს, რომ ისეთი პოლიტიკური პარტია, რომელიც „ლელოა“, ანუ იმ ადამიანებით დაკომპლექტებული პარტია, როგორიც „ლელოა“ დადის ბრიუსელში და იძახის კანდიდატის სტატუსი არ მისცენ საქართველოს. ეს ისეთი ტიპის სისულელე და იმ მასშტაბის ტყუილია, რომელზეც მარგარიტა სიმონიანის სახელმძღვანელოში რომ არის, რომ ისეთი დიდი ტყუილი უნდა უთხრა საზოგადოებას, შოკში ჩააგდონ და იფიქრონ - ასეთ ტყუილს ხომ არ იტყოდნენო, აი უფრო ამას ჰგავს.

სამნიძეს არ დაუსახელებია არავინ, უბრალოდ, როგორც ჩანს, კობახიძემ ჩათვალა, რომ ეს განცხადება შეეძლო გამოეყენებინა მისი პარტიის პოლიტიკური შიშების პასუხად და არ გამკვირვებია, რომ მათ „ლელო“ დაასახელეს, რადგან ისინი ძალიან კარგად ხვდებიან, რომ დღეს, ამ წუთის მდგომარეობით, ცალკე აღებული „ლელო“ შეიძლება ელექტორალურად მათთვის პრობლემას არ წარმოადგენს, მაგრამ ძალიან კარგად ხვდებიან, რომ „ლელო“ არის სწორედ ის მიზიდულობის ცენტრი, რომელსაც აქვს უზარმაზარი პოტენციალი, იმ პოლიტიკური საარჩევნო ძალის ფორმირებისთვის, რომლისაც მათ ყველაზე მეტად ეშინიათ“, - განაცხადა ხიდაშელმა.

თინა ხიდაშელის შეფასებით, რომელიმე პარტია თუ ფიქრობს, რომ „ქართული ოცნება“ სტატუსის მიღებას თავის თავზე გადაიფორმებს - ეს მხოლოდ ამ პარტიის სისუსტის ნიშანია.

„2023 წლის ოქტომბერში მე და თქვენ სტუდიაში თუ-ობით ფორმაში რომ ვლაპარაკობთ - საქართველო სტატუსს ნეტავ მიიღებს თუ არა, მაშინ როცა მოლდოვას უკვე მიღებული აქვს, ამ ფონზე ოპოზიციურ პარტიას რომ ეშინია, სტატუსის მიღებას „ქართული ოცნება“ თავის თავზე გადაიფორმებს და ამას საარჩევნო ყულაბაში აიღებს, ეს მხოლოდ და მხოლოდ ამ პარტიის სისუსტის ნიშანია და მეტი არაფრის და ამიტომ არ მაინტერესებს ასეთი „ლუზერი“ პარტიის პოზიცია. ეს არის „ლუზერული“ პოზიცია, როდესაც საკუთარი უუნარობის გამო ქართველ ამომრჩეველს ვერ აჩვენებ როგორი მარცხის სინდრომის მატარებელია, ქვეყნისთვის მარცხის მომტანია და შემაფერხებელია „ქართული ოცნება“. ვგულისხმობ ყველა პარტიას, ვინც ფიქრობს, რომ სტატუსის მიღებას („ქართული ოცნება“ თავის თავზე გადაიფორმებს).

თუ დღემდე ვერ მოახერხა პოლიტიკურმა პარტიამ ამ ტიპის შიშის გადალახვა, რომ ამ აბსოლუტურად დამარცხებულ, დემოკრატიული სამყაროს გზიდან ამოგდებულ „ქართულ ოცნებასთან“ ამ ტიპის შიშები არ ჰქონდეს - არ მაინტერესებს ამ პოლიტიკური ძალის პოზიცია“, - განაცხადა თინა ხიდაშელმა.

მან ასევე ისაუბრა ოპოზიციურ სპექტრში მიმდინარე პროცესებზე და აღნიშნა, რომ მას ოპოზიციური კოალიცია პროევროპული და დემოკრატიული ძალებით წარმოუდგენია.

გადაცემის წამყვანის კითხვაზე - კოალიცია „ნაციონალური მოძრაობის“ გარეშე წარმოუდგენია თუ არა?! თინა ხიდაშელმა აღნიშნა, რომ არამხოლოდ „ნაციონალური მოძრაობის“, არამედ გიორგი ვაშაძის პარტიის გარეშე, რომელიც „ნაციონალურ მოძრაობას“ შეუერთდა.

ირაკლი მელაშვილი - ხელისუფლებასა და ოპოზიციას შორის რაიმე იდეოლოგიური კომპრომისის ადგილი ფაქტობრივად აღარ არსებობს, არჩევანია ან აქეთ - ევროპისკენ, ან იქით - რუსეთისკენ
ქართული პრესის მიმოხილვა 18.07.2024
გაზმომარაგების უმსხვილესმა კომპანია, „თბილისი ენერჯიმ“ BDO Digital-თან პარტნიორობით კიბერ და ინფორმაციული უსაფრთხოების საერთაშორისო სტანდარტი, ISO/IEC 27001:2022 დანერგა
საქართველოს უნივერსიტეტის ჯანმრთელობის მეცნიერებების სკოლა
ახალი „ლენდ კრუიზერ პრადო“ - ლეგენდის თანამედროვე გაგრძელება
20 ივლისიდან სილქნეტი ოპტიკური ინტერნეტის სიჩქარეებს გაზრდის
კავკასიის ტექნოლოგიების სკოლა და კომპანია „პარვუს ჯგუფი“ აბიტურიენტებს და დაინტერესებულ პირებს ენერგეტიკისა და ელექტროინჟინერიის ახალი საბაკალავრო პროგრამის პრეზენტაციაზე იწვევს
კავკასიის მედიცინის ცენტრი JCI აკრედიტებული პირველი მულტიპროფილური რეფერალური ჰოსპიტალი გახდა ქვეყანაში
მეხუთე თაობის „სანტა ფე“ - მზად ნებისმიერი თავგადასავლისთვის