დღეს, რასაც განათლების სამინისტრო აკეთებს, უკვე ყოველგვარ ზღვარს არის გადასული. ჩვენ ვხედავთ, როგორ ახდენს სკოლების სრულ პოლიტიზებას, სახელისუფლებო კონტროლს, როგორ დევნიან მასწავლებლებს და დირექტორების კანდიდატებს განსხვავებული, ჯანსაღი, კრიტიკული პოზიციის გამო , - ამის შესახებ მიხეილ სააკაშვილის წარმომადგენელმა, სოფო ჯაფარიძემ ბრიფინგზე განაცხადა.

მისივე განცხადებით, „მასწავლებლები ისჯებიან იმისთვის, რომ სურთ ევროპა და არა რუსეთი“.

„ჩვენ ვნახეთ ხელისუფლება როგორ დევნიდა პოლიტიკური ნიშნით მასწავლებლებს, მაგრამ დღეს, რასაც განათლების სამინისტრო აკეთებს, უკვე ყოველგვარ ზღვარს არის გადასული. ჩვენ ვხედავთ როგორ ახდენს სკოლების სრულ პოლიტიზებას. სახელისუფლებო კონტროლს, როგორ დევნიან მასწავლებლებს და დირექტორების კანდიდატებს განსხვავებული, ჯანსაღი, კრიტიკული პოზიციის გამო. მე გუშინ შევხვდი ათობით მასწავლებელს, მოვისმინე მათი წუხილი, მათი პრობლემები და ის თუ როგორ დევნის და როგორ ზღუდავს ყოველ ფეხის ნაბიჯზე მათ სისტემა. ჩვენ ფიზიკურად ვერაფერს ვიზამთ ასე, ვერ ვასწავლით მომავალ თაობას თავისუფლებას თუ არ დავიცავით ამ ადამიანების სიტყვის თავისუფლება, თუ არ უზრუნველვყავით ის, რომ სკოლაში მასწავლებლებს უნდა ჰქონდეთ თავისუფლად თავიანთი პოზიციის დაფიქსირების შესაძლებლობა. ახლაც და მომავალშიც ვიდგები მათ გვერდით, ვიბრძოლებ ბოლომდე თითოეული მათგანის დასაცავად, თქვენი სიტყვის თავისუფლებისთვის. დიახ, მე ვიდგები ამ ადამიანების გვერდით, ამ უდიდესი კომპეტენციის მქონე მასწავლებლების გვერდით, რომლებიც ისჯებიან იმისთვის, რომ მათ სურთ ევროპა, რომლებიც ისჯებიან იმისთვის, რომ მათ არ უნდათ რუსეთი“,-განაცხადა სოფო ჯაფარიძემ.