რუსულმა საოკუპაციო ძალებმა ხარკოვის ცენტრალურ ნაწილზე შეტევა განახორციელეს, ორი რაკეტა სასტუმროს შენობას მოხვდა და შემთხვევის ადგილზე ხანძარი გაჩნდა, - ინფორმაციას უკრაინული მედია საგანგებო სიტუაციების სახელმწიფო სამსახურზე დაყრდნობით ავრცელებს.

მათივე ინფორმაციით, ადგილზე სასწრაფოდ გაგზავნეს სამაშველო ბრიგადები, პოლიცია და სასწრაფო სამედიცინო დახმარება.

"დარტყმის დროს დაზიანდა სასტუმროს სამსართულიანი შენობა, ასევე იქვე გაჩერებული ავტომობილები. ხანძრის ფართობი დაახლოებით 20 კვადრატული მეტრი იყო. შენობიდან 8 ადამიანის ევაკუაცია მოხდა", - აცხადებენ საგანგებო სიტუაციების სამსახურში.

ხარკოვის მერის, იგორ ტერეხოვის განმარტებით, თავდასხმის შედეგად 11 ადამიანი დაშავდა, მათ შორის თურქი ჟურნალისტები.

„ხარკოვის ცენტრში მდებარე სასტუმროს ორი რაკეტა მოხვდა. იქ არც ერთი სამხედრო არ იმყოფებოდა, მაგრამ იყო 30 მშვიდობიანი მოქალაქე, რომელთაგან 11 რუსული რაკეტებით დაიჭრა. დაშავებულთა შორის იყვნენ თურქი ჟურნალისტები. თერთმეტივე დაშავებული საავადმყოფოშია, ერთი ძალიან მძიმე მდგომარეობაშია. სასტუმროს გარდა დაზიანდა საცხოვრებელი სახლები - ერთი კომუნალური, ერთი კერძო, მანქანების შოურუმი, საწარმოო", - განაცხადა მერმა.