წითელ ზღვაში საზღვაო უსაფრთხოების მხარდასაჭერად ახალი ზელანდია თავდაცვის ჯგუფს გაგზავნის, - ამის შესახებ ახალი ზელანდიის პრემიერ-მინისტრმა, კრისტოფერ ლუქსონმა განაცხადა.

„კომერციულ და საზღვაო გემებზე „ჰუსიტების“ თავდასხმები უკანონო, მიუღებელი და ღრმა დესტაბილიზაციის გამომწვევია“, - განაცხადა კრისტოფერ ლუქსონმა.

ლუქსონმა აღნიშნა, რომ თავდაცვის ჯგუფი ექვსი წევრისგან შედგება და ისინი იემენში მიმდინარე რაიმე სახის ბრძოლაში მონაწილეობას არ მიიღებენ.

„თავდაცვის ჯგუფის განთავსება ახალი ზელანდიის მიერ თავისუფალი ნაოსნობის დაცვის ხანგრძლივი ისტორიის გაგრძელებაა“, - აღნიშნა ახალი ზელანდიის პრემიერ-მინისტრმა.

შეგახსენებთ, დღეს, აშშ-მა და დიდმა ბრიტანეთმა იემენელი „ჰუსიტების“ წინააღმდეგ საჰაერო დარტყმების ახალი სერია განახორციელეს.