პოლარიზაციის პრობლემა და გამოწვევა ბევრ ქვეყანაშია, მათ შორის გერმანიაშიც, მაგრამ მას დემოკრატიული ცხოვრებისთვის სარგებელი არ მოაქვს, - ამის შესახებ საქართველოში გერმანიის ელჩმა პეტერ ფიშერმა პარლამენტში ჟურნალისტებს განუცხადა.

„დემოკრატიულ საზოგადოებაში სხვადასხვა ჯგუფებმა უნდა გამონახონ გზა ერთად მუშაობისთვის, ერთმანეთის მიმართ პატივისცემისთვის და ერთმანეთის არჩევანის მიღებისთვის. ეს არ არის ყველაფერი ან არაფერი“, - აღნიშნა გერმანელმა დიპლომატმა.

მან იმედი გამოთქვა, რომ საქართველოს ხელისუფლება და ოპოზიცია შეძლებენ, ერთად იმუშაონ ევროკომისიის მიერ საქართველოსთვის განსაზღვრულ 9 ნაბიჯზე, რომლის შესრულებაც აუცილებელია იმისთვის, რომ საქართველო ევროინტეგრაციის პროცესში შემდგომ ეტაპზე - გაწევრიანების მოლაპარაკებების დაწყებაზე გადავიდეს.