პრემიერ-მინისტრ ირაკლი კობახიძის განცხადებით, მთავრობის მეთაურის რანგში, ბრიუსელში პირველი ვიზიტისას მას ექნება აქტიური კონსულტაციები, რომელიც ქვეყანას ევროკავშირთან დააახლოებს.

ამის შესახებ ჟურნალისტებს თავად კობახიძემ განუცხადა.

„მას შემდეგ რაც მივიღეთ კანდიდატის სტატუსი, კიდევ უფრო მეტად უნდა გავააქტიუროთ, ბუნებრივია, ჩვენი თანამშრომლობა. გვექნება აქტიური კონსულტაციები ყველა თემასთან დაკავშირებით, რაც ეხება ჩვენი ქვეყნის კიდევ უფრო მეტად დაახლოებას ევროკავშირთან. დეტალურად განვიხილავთ, რა თქმა უნდა, ასოცირების დღის წესრიგის საკითხებს, მათ შორის განვიხილავთ, ბუნებრივია, 9 პუნქტის შესრულების გეგმას, ყველა თემაზე გვექნება საუბარი. კიდევ ერთხელ გავიმეორებ, რომ ჩვენ ყველაფერს გავაკეთებთ ევროკავშირში საქართველოს სრული ინტეგრაციისკენ. აქეთკენ იქნება მიმართული, რა თქმა უნდა, მთავრობის საქმიანობა“,- განაცხადა ირაკლი კობახიძემ.