უკრაინის ვიცე-პრემიერი - პოლონეთში 160 ტონამდე მარცვლეული განადგურდა
პოლონეთის რკინიგზის სადგურზე დაუსჯელობისა და უპასუხისმგებლობის აქტის შედეგად დაახლოებით 160 ტონა უკრაინული მარცვლეული განადგურდა, - ამის შესახებ უკრაინის ვიცე-პრემიერმა და ინფრასტრუქტურის მინისტრმა, ალექსანდრე კუბრაკოვმა განაცხადა.
მან სოციალურ ქსელ X-ზე მატარებლის ვაგონებიდან ჩამოყრილი მარცვლეულის ფოტოები გამოაქვეყნა.
„ამ სურათებზე ნაჩვენებია 160 ტონა განადგურებული უკრაინული მარცვლეული. მარცვლეული ტრანზიტით გდანსკის პორტში, შემდეგ კი სხვა ქვეყნებში იგზავნებოდა. ეს პოლონეთის რკინიგზის სადგურებზე ვანდალიზმის მეოთხე შემთხვევაა, დაუსჯელობისა და უპასუხისმგებლობის მეოთხე შემთხვევა“, - წერს უკრაინის ვიცე-პრემიერი.
მისი თქმით, ყველა სასოფლო-სამეურნეო პროდუქტი ტრანსპორტირდება დალუქული ვაგონებით და სხვა ქვეყნებში ტრანზიტით იგზავნება.
„როდემდე დაუშვებს ხელისუფლება და პოლონეთის პოლიცია ამ ვანდალიზმის გაგრძელებას?“ - წერს ალექსანდრე კუბრაკოვი.
