ოპოზიციონერი დეპუტატები გამობრძანდით და თქვით, რამდენად სწორი და ლოგიკურია ვენეციის კომისიის შეთავაზება, რომ ანტიკორუფციული ბიუროს უფროსი, რომელსაც ჩვენ კორუფციის წინააღმდეგ ბრძოლას ვთხოვთ, კორუფციის წინააღმდეგ ბრძოლის საკითხებით უფრო ეფექტურად დაკავდება თუ ის ნარკოტიკული ზემოქმედების ქვეშ იქნება , - აღნიშნული განცხადება პარლამენტის იურიდიულ საკითხთა კომიტეტის თავმჯდომარემ ანრი ოხანაშვილმა პლენარულ სხდომაზე განაცხადა.

ოხანაშვილმა დღეს ხაზგასმით აღნიშნა, რომ “კორუფციის წინააღმდეგ ბრძოლის შესახებ“ კანონში დაგეგმილი ცვლილებების ფარგლებში ვენეციის კომისიის შემოთავაზებით უქმდება ანტიკორუფციული ბიუროს უფროსის უფლებამოსილების ვადამდე შეწყვეტის ის საფუძველი, რომელიც დაკავშირებულია მის მიერ ნარკოტიკული საშუალებების მოხმარებასთან და სავალდებულო ნარკოლოგიური შემოწმების გავლისგან თავის არიდებასთან.

ოხანაშვილმა ოპოზიციას მიმართა ერთად იმსჯელონ, რამდენად სწორი იქნება აღნიშნულის გათვალისწინება.

“არის ვენეციის კომისიის რეკომენდაცია, რომ ასეთ შემთხვევაში ანტიკორუფციული სამსახურის უფროსი დაკავებული თანამდებობისგან არ გათავისუფლდეს.

პარტიულმა ტელევიზიებმა თქვეს, რომ თურმე ვენეციის კომისიის ამ რეკომენდაციას ქილიკით ვაჟღერებ. როდესაც სახელმწიფოებრიობის და სამშობლოს განცდა არა გაქვს, იმას კი არ ამბობ, რაც კომისიამ დაწერა და ამის თაობაზე კი არ აქვთ ბუნებრივი რეაქცია, საღი აზრისა და ანალიზის უნარს არ გამოხატავენ.

ფაქტია, რომ ვენეციის კომისია გვეუბნება, რომ ანტიკორუფციული ბიუროს უფროსმა ნარკოტიკული საშუალება რომ მოიხმაროს ან ნარკოტესტს თავი აარიდოს, ეს თურმე ნორმალური მოცემულობა ყოფილა. ამ დროს რომელიმე დეპუტატს რომ გაუგზავნოს მითითება, რომ ეს გააკეთოს, ეს ნორმალური მოვლენა ყოფილა... ისე რომ მოხდეს, რომ შეტყობინებები ნარკოტიკული ზემოქმედების ქვეშ გააგზავნა, მერე ერთ ამბავს ატეხენ, რომ თურმე ასეთ მდგომარეობაში იყო“, - განაცხადა ანრი ოხანაშვილმა.

საკანონმდებლო პაკეტის ფარგლებში წარმოდგენილია ცვლილება, რომლითაც ანტიკორუფციული ბიუროს უფროსის უფლებამოსილების ვადამდე შეწყვეტის ის საფუძველი უქმდება, რომელიც დაკავშირებული ნარკოტიკული საშუალების მოხმარებასა და სავალდებულო ნარკოლოგიური შემოწმების გავლისთვის თავის არიდებასთან.