ნაცვლად იმისა, რომ საქართველოში ქალები გააძლიერონ, ივანიშვილის პარტიის პირობებში ხდება მათი განდევნა პოლიტიკური, ეკონომიკური სივრციდან და ქვეყნიდანაც, - ამის შესახებ ფრაქცია "ერთიანი ნაციონალური მოძრაობის" თავმჯდომარემ, თინა ბოკუჩავამ ქალთა კვოტირების გაუქმების საკითხზე განაცხადა.

მისივე თქმით, "ქართული ოცნება" და "გირჩი" ერთმანეთთან გარიგდნენ, რაც მიუღებელია.

"მაშინ როდესაც ყოველდღიურად ქალებს, მათ შორის, დედებს უწევთ უმძიმესი არჩევანის გაკეთება, სიღარიბეში გაზარდონ შვილები, თუ იძულებით ემიგრაციაში წავიდნენ, მაშინ როდესაც ჩვენი მოქალაქეების იძულებით ემიგრაციაში მყოფი 70% სწორედ ქალები არიან, ნაცვლად იმისა, რომ ეკონომიკურად და პოლიტიკურად გაძლიერდნენ ქალები საქართველოში, ივანიშვილის პარტიის პირობებში ხდება მათი განდევნა პოლიტიკური სივრციდან, ეკონომიკური სივრციდან და ქვეყნიდანაც. ეს არის ის მოცემულობა, რაც ივანიშვილის 13 წლიანმა მმართველობამ მოიტანა.

ეს არ არის შეთანხმება. ეს არის გარიგება და გარიგებები ადამიანების უფლებების ხარჯზე და საქართველოს მოქალაქეების ინტერესების ხარჯზე, არის ჩემთვის პირადად კატეგორიულად მიუღებელი. ეს არის ტრანზაქციული პოლიტიკა, რომელიც არ არის არც იდეებზე და არც ღირებულებებზე დაფუძნებული. ვფიქრობ, რომ ასეთი პოლიტიკის ადგილი მომავალ მრავალპარტიულ კოალიციურ ხელისუფლებაში არ უნდა იყოს," - განაცხადა ბოკუჩავამ.

ცნობისთვის, პარლამენტი დაჩქარებული წესით იხილავს “გირჩის“ მიერ მომზადებულ პროექტს, რომელიც საარჩევნო სიების ფორმირების პროცესში გენდერული კვოტირების ვალდებულების გაუქმებას ითვალისწინებს. “გირჩის“ პროექტის თანახმად, ყველა ის საკანონმდებლო ნორმა უქმდება, რომელიც სიების შედგენისას გენდერული კვოტირების გათვალისწინებას ითხოვს.