ესპანეთის დეპუტატთა პალატის (კონგრესის) ევროკავშირის შერეული კომიტეტის სხდომაზე საგარეო ურთიერთობათა კომიტეტის დელეგაციას და დელეგაციის ხელმძღვანელს ნიკოლოზ სამხარაძეს მოუსმინეს.

ამის შესახებ ინფორმაციას პარლამენტის პრესსამსახური ავრცელებს.

მათივე ცნობით, საუბრის ძირითად თემებს წარმოადგენდა საქართველოს ევროკავშირში ინტეგრაცია, 9 რეკომენდაციის შესრულების პროცესი და ამ მხრივ მიღწეული პროგრესი.

„ქართული დელეგაციის წევრებმა ესპანელ კოლეგებს საქართველოს ოკუპირებულ რეგიონებში არსებულ მძიმე ვითარებასა და რეგიონული უსაფრთხოების გამოწვევებზე მიაწოდეს ინფორმაცია. ყურადღება გამახვილდა ქვეყნის ეკონომიკურ გარემოსა და დაგეგმილ სტრატეგიულ პროექტებზე, რომელიც კიდევ უფრო დააახლოებს საქართველოს ევროკავშირთან. მათ შორის, ხაზი გაესვა წყალქვეშა კაბელის და ანაკლიის პროექტების განხორციელების მნიშვნელობას“,-აღნიშნულია გავრცელებულ ინფორმაციაში.

„შეხვედრა გვქონდა დეპუტატთა პალატაში ევროკავშირის შერეულ კომიტეტთან, რომლის წევრები როგორც სენატორები, ასევე დეპუტატთა პალატის წევრები არიან. შეხვედრაზე, განხილვის მთავარი საკითხი იყო საქართველოს ევროკავშირში გაწევრიანება. ჩვენ მივაწოდეთ ინფორმაცია იმ პროგრესის შესახებ, რომელიც 9 პუნქტთან დაკავშირებით გვაქვს და ვთხოვეთ მხარდაჭერა, რომ წლის ბოლოს ესპანეთმა მხარი დაუჭიროს საქართველოსთვის მოლაპარაკებების გახსნას", - განაცხადა ნიკოლოზ სამხარაძემ.

პრესსამსახურის ცნობით, საპარლამენტო დელეგაციის შემადგენლობაში არიან: საგარეო ურთიერთობათა კომიტეტის წევრი, გარემოს დაცვისა და ბუნებრივი რესურსების კომიტეტის თავმჯდომარე მაია ბითაძე; ესპანეთთან მეგობრობის ჯგუფის ხელმძღვანელი, დარგობრივი ეკონომიკისა და ეკონომიკური პოლიტიკის კომიტეტის თავმჯდომარე დავით სონღულაშვილი.